Ermuko ostalaritza dinamizatzeko online mintegiak

Ermuko Udalak lineako bi ''webinar'' edo mintegi online antolatu ditu tokiko ostalaritza sektorerako, Covid-19ak kolektiboan duen eragin negatiboari aurre egiteko. Egitasmo horiek erakundeak 2020an abian jarri zuen ostalaritza dinamizatzeko proiektuaren barruan kokatzen dira, irtenbide berriak bilatu eta tokiko negozioak hobetzeko ekintzak diseinatu ahal izateko.

Duela hilabete batzuk, Udalak hainbat bilera egin zituen udalerriko ostalariekin, eta azken batzarrean, online prestakuntza-ekintzak garatzeko aukera aurkeztu zen, ostalaritzaren gakoak zeintzuk izan zitezkeen bertatik bertara ezagutzeko eta, pandemia garaian, negozioa berrabiarazi ahal izan duten establezimenduen kasu arrakastatsuak ikusteko.

Herriko ostalaritzaren kezkak hobeto ezagutzeko galdetegi bat egin ondoren, bi ''webinar'' antolatu dira. Hala, ieTeam aholkularitza-enpresak, ostalaritzan eta jatetxeetan eskarmentu handia duenak, bi online saio eskainiko ditu egun hauetan:

• Otsailak 8, astelehena, 10:00etan: 4.0 ostalaritzaren gakoak. Mintegi honetan ostalaritzaren digitalizazioaz hitz egingo da, ERP tresna informatikoekin, digitalizazioaren errentagarritasunarekin eta marketin digitalarekin, besteak beste.
• Otsailak 10, asteazkena, 10:00etan: ostalaritzako erabiltzaile esperientzia berria. Hemen ostalaritzako esperientzia berritzaileak landuko dira, hala nola espazio berriak, fideltasuna, lankidetzak, etab.

Bi webinarretan eskualdeko arrakasta kasuak aztertuko dituzte, Azpeitiko DA eta Hondarribiko Badia tabernak, besteak beste. Horrez gain, Nuño Urrea ostalaritzako aholkulariak, Unai Altuna Baratze tabernako jabeak eta Carlos Miravientes Vinoteca Elgoibarko jabeak parte hartuko dute.

Ekitaldiak modu telematikoan emango dira Zoom tresnaren bidez. Interesa duten pertsonek galdetegi honen bidez eman ahal izango dute izena, eta saioetarako esteka e-mailez bidaliko zaie.