Julene Bouzo, Espainiako txapeldunordea altuera jauzian

1,74 metrora zegoen listoiaren gainetik salto egin du antequeran (Malagan) jokatutako txapelketan 20 urte azpiko kategorian

Julene Bouzo Agirregomezkorta 2021eko altuera jauziko Espainiako txapeldunordea da hogei urtetik beherako emakumezkoen kategorian (20 urte azpikoak). Ermuarrak zilarrezko domina jantzi du azken asteburuan, Antequeran (Malagan) hiriko 6. Mendurreneko Atletismo Zentroko pista estalian, jokatu den XLVIII Espainiako Txapelketan. Bidezabal Durango Atletismo Taldeko atleta gazteak sailkapeneko bigarren postua eskuratu zuen 1,74 metroko jauzia egin ondoren, hirugarren saiakeran. Ondoren, 1,76ko altuera gainditzen saiatu arren, ez zuen lortu. Emaitza horrekin, ranking nazionalean bigarren postuan kokatu zen. Txapelketa Trops-Cueva de Nerja taldeko Una Stancev Stevanovic kirolariak irabazi zuen, 1,79 metroko altueran zegoen listoi gainetik salto eginda. 

Bestalde, txapelketa horretan eta modalitate berean, baina gizonezkoetan, Eneko Larrea Perezek ere zilarrezko domina lortu zuen, 2 metro eta 04 zentimetroko markarekin. Aurretik, U. Colomenca Athlético taldeko Edgar Climent Zhou geratu zen txapeldun. Eneko Mallabikoa da, Eibarko Deportiboko Klubeko kidea, eta Ermuan entrenatzen du, Antonio Cid Iglesiasek zuzentzen duen taldearekin. Zorionak biei eta herriko Atletismo taldeari.