Ermuak adinekoen jarduera fisikoetarako baldintzak hobetu eta malgutu ditu

Ermuak udal kirol instalazioetan eskaintzen diren zerbitzuen tasa arautzen duen 27. Ordenantza Fiskalaren zati bat aldatuko du. Udalbatzak aho batez onartu du hasierako aldaketaren erabakia, martxoaren 10eko asteazkenean egindako Osoko Bilkuran. Aldaketak aintzat hartu du Pasialeku Hirugarren Adinekoen Elkarteak egindako eskaera; eta aldaketari esker, pertsona nagusientzako ikastaro monografikoak eta kanpainak adin horretako herritar guztiei irekita egongo dira eta haien baldintzak malgutuko dira. Jada adinekoentzako jarduera fisikoko ikastaroetan interesa duen pertsonek ez dute erretiratuen etxeko bazkidea izan beharko, ezta kiroldegiko abonatu ere. Jarduera horietarako izen-ematea urte osoan egongo da zabalik eta ordaindu beharreko kuota izena emateko unearen araberakoa izango da. Interesduna urteko lehen lauhilekoan inskribatzen bada,%100 ordainduko du; bigarren lauhilekoan inskribatuz gero,%30eko beherapena izango du, eta hirugarrenean egiten bada, interesdunak urteko kuotaren%60 gutxiago ordainduko.

Aldaketa hori hasierako izaeraz onartu da, eta 2021eko urte honetatik aurrera aplikatuko da. Erabakia jendaurrean jarriko da 15 egun balioduneko epean, probintziako aldizkari ofizialean argitaratutako iragarki baten bidez, pertsonek horren berri izan dezaten, espedientea azter dezaten eta egokitzat jotzen dituzten erreklamazioak, alegazioak edo iradokizunak aurkez ditzaten. Horrelakorik ez badago, erabakia behin betiko onetsitzat joko da, eta aldaketaren testua aldizkarian argitaratuko da, erabaki berririk hartu behar izan gabe.