Bizkaiko Emakumeen eta Gizonen Berdintasunerako Lurralde Sarearen lehenengo topaketan parte hartu du Ermuak

Bizkaiko Foru Aldundiak abian jarri du Bizkaiko Emakumeen eta Gizonen Berdintasunerako Lurralde Sarea. Udalerrien eta Aldundiaren arteko lanerako, hausnarketarako eta koordinaziorako gunea izateko sortu da sarea, lurrari atxikia, udalerrien behar eta eskaeretatik hurbil dagoena eta modu kolektiboan eraikia.

Sarearen lehenengo topaketa ostegun honetan izan da, eta bertan egon dira Bizkaiko Ahaldun Nagusia, Unai Rementeria, Enplegua, Gizarte Inklusioa eta Berdintasuna Sustatzeko foru diputatua, Teresa Laespada, Batzar Nagusietako eta Emakundeko ordezkariak eta dozenaka alkate eta zinegotzi. Juan Carlos Abascal Ermuko alkateak eta Beatriz Gamiz Berdintasun zinegotziak parte hartu dute ekitaldian.

Sarea politika publikoen erantzuna frogatzeko eta oro har herritar guztien egoera eta, bereziki, emakumeena, aztertzeko balio izan digun krisi pandemikoaren egoeran sortu da. Honen helburua da toki-mailako berdintasun-politiketan eragitea eta udaletan berdintasun-arloaren zeregina indartzea, betiere Bizkaiko Lurralde Historikoaren aniztasuna kontuan hartuta. Sareak informazio-, aholkularitza- eta laguntza-zerbitzua eskainiko du Bizkaiko udalerrientzat.

Laespada diputatuak jardunaldian adierazi duenez, "gizarte berdinzaleago eta justuago baterantz aurrera egiteko gaitasunen eta ahaleginen %100 beharrezkoak dira”. Hori horrela, Bizkaiko 112 udalerriei ekimenarekin bat egiteko deia egin die. "Batasunaren eta elkarlanaren beharra azpimarratu nahi dut; batasunak indarra egiten du; koordinazioak osagarritasuna errazten du, bikoiztasunak saihesten ditu, ahaleginak biltzen ditu, emaitzak biderkatzen laguntzen du eta esfortzuak eta arreta ekonomizatzen ditu", azaldu du.