Iñigo Ugena brontzezko domina lortu du pertikan, 23 urte azpikoen Espainiako Txapelketan

Iñigo Ugena Fernández atleta ermuarrak brontzezko domina lortu du azken asteburuan Nerjan (Malaga) jokatu den 23 urte azpiko Espainiako XXXVI txapelketan. Ermuarra podiumera igo da pertika espezialitatean 5,05 metroko jauzia egin eta sailkapen nagusian hirugarren postuan geratuta. Gure herriko atleta hau Donostiako Realeko Atletismo Klubaren elastikoarekin lehiatu zen, kide baita.

Bost metro eta bost zentimetroko altuera da, oraingoz, Iñigoren marka pertsonalik onena. Marka hau, aurtengo otsailean ere lortu zuen Valentzian, pista estaliko 23 urte azpiko XXXV Txapelketan. Iñigok atletismoko hainbat espezialitatetan egin du proba; 60 metrokoan eta 60 metro hesietan. Hala ere, gehien nabarmentzen dena pertika jauzian izan da, bere bilakaera ikusteko esan behar 4,60 metro gainditzen hasi zela eta, jada, 5 metroko muga gainditu duela. Bere progresioa oso ona da eta ziur etorkizunean altuera handiagoak gaindituko dituela.

Donostiako taldeak emaitza onak lortu zituen Nerjan, espedizioan joandako kirolarietatik zazpik domina batez bueltatu baitziren etxera.