Miguel Angel Blanco eta Sotero Mazo gogoan, gaur Ermuan

Duela bi hamarkada baino gehiago ETAk eraildako Sotero Mazo Figueras eta Miguel Angel Blanco Garrido herriko bizilagunak omentzeko ekitaldi instituzionala egin du Ermuko Udalak.

San Pelaion, terrorismoaren biktimak oroitzeko monolitoan, izan da omenaldia astearte honetan, uztailaren 13an. Bertan izan dira Udalbatzako talde politiko guztietako kideak PP izan ezik, Sotero Mazoren senideak, Vicente Reyes Espainiako Gobernuaren Euskadiko ordezkariordea, Beatriz Artolazabal Eusko Jaurlaritzako Berdintasun, Justizia eta Gizarte politiketako sailburua eta Aintzane Ezenarro Memoriaren, Bizikidetzaren eta Giza Eskubideen Institutuko zuzendaria.

Joan den larunbatean, uztailaren 10ean, 24 urte bete ziren Miguel Angel Blanco Ermuko zinegotzi popularra bahitu eta hil zutenetik, eta ia 41 urte Sotero Mazo ile-apaintzaile ermuarra hil zuten tiroketatik.

Horren harira, Juan Carlos Abascal alkateak azpimarratu du ETAk "pertsonen eskubiderik oinarrizkoena eta funtsezkoena" hautsi zuela: "Bizitzeko eskubidea, eta hori gabe ez dago beste eskubiderik. Baina ez gintuzten menderatu, ezta gure duintasuna eta askatasuna kendu ere".

Oraindik indarkeriazko ekintzak aldarrikatzen direla salatu ostean, Abascalek azaldu du garaia dela "elkarbizitzeko eta guztion artean eraikitzeko, datozen belaunaldien alde, etorkizunera begira baina iragana ahaztu gabe, historia errepika ez dadin".

"Mundu osoarekiko errespetuz eta tolerantziaz joka dezagun, desberdinen arteko bizikidetzarako irtenbide gisa. Horrela bakarrik lortuko dugu benetako bake iraunkorra", adierazi du alkate ermuarrak.

Ekitaldia amaitzeko, lore eskaintza egin dute Ermuko bi biktimen omenez.

Lerro hauen azpian ekitaldi instituzionalaren bideo osoa ikus dezakezue.