Aitor Hernandez, Iruñean garaile eta Amurrion hirugarren

Aitor Hernandez (Specialized-Ermua Innpulso) txirrindulari ermuarrak irabazi du Iruñeko III. Ziklokrossa, urtebeteko etenaren ostean igande honetan euskal-nafar egutegira itzuli den lasterketa.

Specialized taldeko txirrindulariak garaipen argia lortu du, lehen urratsetik lasterketa gidatuz, eta podiuma Asier Arreguik eta Josu Torresek osatu dute.

“Lasterketa interesgarria izan da zirkuitu gogor batean, lokatzik gabekoa baina gogorra hala ere. Arrapala ere gogorra zen, bizikleta gainean igarotzen bazen ere, eta gainerakoan kosta egiten zen abiadura hartzea. Oso pozik nago sentsazioekin, asteburua ona izan dela uste dut. Beraz, pozik nago emaitza onak lortzen jarraitzeagatik”, adierazi du.

Amurrioko ziklokrossean ere izan da Aitor Hernandez hilaren 18an, larunbatean, eta hirugarren postua lortu du. Lehorrean lehiatu den lehenengo lasterketa izan da duela zenbait asteburutatik.