Ermuak ia 22 milioi euroko aurrekontua izango du 2022. urtean

Ermuko Udalbatzak ia 22 milioi euroko udal aurrekontua hasierako izaeraz onartu du aste honetan 2022. urteko ekitaldirako. Gobernu taldeak astearte arratsaldean aurkeztu eta defendatu zuen sarrera eta gastuen arteko proiektua, zeinak PSE-EE/PSOE (7) eta EAJ/PNV (3) alderdien aldeko botoak jaso dituen, eta oposizioko EH Bilduk (3), Elkarrekin Ermuak (2) eta PPk (1) taldeen ezezkoa.

Bukatzear gauden urtean baino 1,3 milioi gehiago izango dira (%6 gehiago). Bertan 733.200 €-ko inbertsioak zehazten dira, besteak beste, udal liburutegia osorik eraberritzeko, Bizkaia etorbidea eta Zerukoa etorbidea kaleen irisgarritasuna, instalazioak, digitalizazioa eta informatika hobetzeko.

Hasierako onarpen horren ondoren, erabakia Bizkaiko aldizkari ofizialean argitaratuko da, guztiok ezagutzerik izan eta hogei egun balioduneko epean alegazioak aurkeztu ahal izateko. Aurrekontua behin betikoa izango da, alegaziorik jasotzen ez badu.

Bost udal taldeek proiektuari eta aurkeztutako zuzenketei buruz zabal eta luze eztabaidatu dute bi txandatan, datorren urteko aurrekontua bozkatu aurretik. Eztabaida horretan, alderdi bakoitzak bere jarrerei eta planteamenduei eutsi die, inolako kontzesiorik gabe. Hiru ordu eta erdi baino gehiagoko saioaren ondoren, bozketek hala erakusten dute. Talde bakoitzak defendatutako jarrerak eta hitzez hitzeko adierazpenak bideo aktan jasota daude. Bideo aktan hizlaria nor den eta zein momentu edo minutuan hitz egiten duen adierazten dira.

Alderdi Popularrak 385.000 euroko hiru zuzenketa partzial eta osoko zuzenketa bat aurkeztu zituen. Proposamenak estekatutako dokumentuan dituzue. Ez ziren onartu. Zuzenketei bere ordezkariak bakarrik eman zien aldeko botoa. Gainerako alderdiek kontrako bozka eman zioten horren planteamenduei.

Elkarrekin Ermua taldeak ere zuzenketa partzialak aurkeztu zituen, 143.556 €ko zenbatekoak, hainbat gauza proposatuz. Proposamena estekatutako dokumentuan duzue. Honek bere ordezkarien aldeko botoa (2), EH Bildurena (3) eta PPko ordezkariaren abstentzioa (1) jaso zituen. Gobernu taldearen 10 botoak kontrakoak izan ziren.

EH Bildu taldeak osoko zuzenketa aurkeztu zuen eta proiektua bertan behera uzteko eskatu zuen. Agiria eta arrazoiak estekatutako dokumentuan dituzue. EH Bilduk (3) eta Elkarrekin Ermuak (2) horren alde bozkatu zuten. Abstenitu egin zen PPko ordezkaria (1) eta Gobernu taldearen 10 botoak kontrakoak izan ziren.

Udalaren aurrekontua 21.994.841,57 eurokoa da guztira. Horrez gain, erakunde autonomoen aurrekontuak daude: Euskaltegiak, 200.502,24 euro izango ditu, eta ''Promosa'' sozietate publikoak, 2.220.000 euro.

• 2022ko aurrekontuaren memoria

Aurrekontuarekin batera, Korporazioaren edo Lanpostuen Zerrendaren (LPZ) zerbitzura dauden langileen plantilla organikoa ere onartu da.

Lerro hauen azpian utzi dugun osoko bilkuraren bideo-aktak hiru ordu eta erdi baino gehiagoko saioan esandako eta gertatutako guztia jasotzen du. Gainera, dokumentazio osagarriaren erlaitzean saioaren dokumentu guztiak – Aurrekontua, zuzenketak, Lanpostuen Zerrenda eta abar – Kontsulta daitezke orrialde berean.