Ego ibaia eta inguruko natura aztertu dute Oinarrizko Lanbide Heziketako Institutuaren ikasleek

Ekosistemari, bertako florari, faunari eta egoerari buruzko unitate didaktiko bat landu dute.

Ermua-Mallabiko Oinarrizko Lanbide Heziketako Institutuko ikasleak Ego ibaian izan dira duela gutxi, ikastetxetik hurbilen dagoen ingurune naturaleko ekosistema ezagutzeko. Taldeek unitate didaktiko bat landu eta landa-lana egin dute, zehazki, Mallabian bertan Egoi ibaia igarotzen den hainbat puntutan.

Esperientzia hori Ingurumen Zientziei lotutako arloan txertatzen da, eta ikasten ari diren espezialitateko curriculum akademikoan jasotzen da. Ekimenak ikasgelan landutako ikasgaia eta ezagutza teorikoak sendotzen ditu, eta horien osagarri, ibai ertzera bisita egin da, gaiaren inguruan sakontzeko modu atseginago eta ezberdinean. Bisitak eta landa-lanak onurak dakarzkio ikasketa-prozesuari, besteak beste: errutina aldatzea, gizarte-trebetasunak hobetzea, ikasleengan jakin-mina eta interes berriak sustatzea, lankidetza- eta talde-lana sustatzea eta sedentarismoa utzi eta fisikoki aktibatzea.

Jardueraren ondoren, ikasleek Ego ibaiaren alderdi teoriko zein praktiko esanguratsuenak jasotzen dituen triptiko bat egin dute. Bertan jasotzen da honakoa: Oiz mendiaren magalean jaiotzen, 800 metroko altueran, eta 15 kilometroko ibilbidearen ondoren Deba ibaian itsasoratzen dela. Bere ibilbidean Mallabia, Ermua eta Eibar zeharkatzen ditu, bere urak Maltzagan Deba errekari gehitu arte. Ibai honek kutsadura-arazoak ditu, eskualdean bizi garen pertsona guztien industriaren eta bizitegi-jardueraren eraginez. Bere ibilguetan aurki ditzakegun faunarik ohikoenak martin arrantzale txoria, lertxunak edo salamandrak dira. Zuhaitzen artean lizar, pago, haritz edo haltz espezieak ditugu.

Irakasle-taldea baikorra da ikasleen artean esperientziak izan duen harrera onagatik eta izan dituen emaitza positiboengatik; izan ere, ikasgelatik kanpo elkarbizitzarako gune izateaz gain, irakasgaira beste ikuspegi batetik hurbiltzeko aukera eman du. Dagoeneko baloratu dute saio mota horiek ikasturte honetan eta hurrengoetan mantentzea.