Hemen da Sagardo Egunaren VIII. edizioa

Pandemia dela eta urtebeteko etenaldiaren ondoren, Ermuko Gazte Asanbladak Sagardo Egunaren edizio berria antolatu du larunbat honetarako, martxoak 5. Zortzigarren edizioak hogei bat ostalaritza-establezimendu eta okindegiren, Ermuko Merkataritza eta Ostalaritza Elkartearen eta Nü Shu Ermuko Gazte Feministen elkartearen laguntza jaso du.

Hamalau sagardotegik euren produktuak eskainiko dituzte 12:30etik 14:30era Orbe Kardinala plazan. 6 euroren truke, sagardoa dastatzeko edalontzia eta pintxoa eskuratu ahal izango dira. Arratsaldean, 18:30ean, sagardotegi gunea berriro zabalduko da produktu guztiak bukatu arte. 22:00etan olinpiadak ospatuko dira, eta Erabaki Zeuek, Amildegi eta Ladilla Gagaren kontzertuek emango diote amaiera jaiari 22:30etik 02:00etara.