Koloneko minbiziaren testa egitera eskatzen digun kanpaina

Detekzio goiztiarrak epe laburreko hilkortasuna %30 eta %35 artean murrizten du.

Azken urtean koloneko 2.154 minbizi-kasu diagnostikatu ziren Euskadin, horietatik 1.143 Bizkaian, eta 50 eta 69 urte bitarteko adin-tartea da arriskurik handiena.* Minbiziaren Behatokiaren datuak

Koloneko Minbiziaren Prebentziorako Eguna dela eta –gaur martxoak 31–, Minbiziaren Aurkako Elkarteak "beste testa" kanpaina aurkeztu du. Inork ez du horri buruz hitz egiten, baina bizia salba diezazuke. Euskadin arriskuan dauden herritar guztiak Osakidetzak ezarritako baheketa-programetan parte hartzera gonbidatzen ditu, tumore mota hori garaiz detektatuz gero kasuen %90ean gainditzen lagun baitezakete.

«Test» hitza gure egunerokotasunean sartu da, Covid-19aren pandemiagatik eta harekin ezagutu ditugun proba ugariengatik. Elkarteak gogorarazi digunez, badago beste test bat: eginkarietan Ezkutatutako Odol Testa (TSOH), epe laburreko heriotza-tasa %30 eta %35 artean jaisten duena.

Gainera, Euskadiko Biztanleria Programaren datuekin egindako azterlan batek erakutsi du baheketa-programetan parte hartzen duten pertsonen biziraupena %23,4 hazi dela 5 urtera.

Baheketa-programetarako sarbidean dagoen desberdintasunak eta desinformazioak eragin dezakete parte ez hartzea

Koloneko minbizia, intzidentzia handieneko tumorea (2.154 kasu diagnostikatu ziren azken urtean Euskadin, eta horietatik 1.143 Bizkaian) goiz detekta daitekeen hiru tumoreetako bat da, eta kasu batzuetan saihestu ere egin daiteke, baheketa-programei esker.

Gaixotasun horrengatik arrisku ertaina duten pertsonak 50 eta 69 urte bitartekoak dira; beraz, adin-tarte horretako biztanle guztiek koloneko minbizia bahetzeko programetan parte hartzea lortzeak tumore mota horrek eragindako heriotza kopurua murriztuko luke.

Programa horien benetako eragin positiboa lortzeko, beharrezkoa da xede-biztanleriaren parte-hartzea %65etik gorakoa izatea. Nafarroako Foru Erkidegoak eta Euskadik bakarrik gainditzen dute parte-hartze hori, %73 eta %72, hurrenez hurren.

Desinformazioa eta emaitza positiboarekiko beldurra dira, besteak beste, Euskadiko biztanleen %28k koloneko baheketetan parte ez hartzeko arrazoiak. Horregatik, Minbiziaren Aurkako Bizkaiko Elkartetik informazioa helarazi nahi diegu partaidetza-tasa txikienak dituzten pertsona eta kolektiboei.

Gaur, martxoaren 31n, koloneko minbiziaren testaren eta detekzio goiztiarraren berri emango dute Bilboko Kale Nagusian, 11:00etatik 14:00etara eta 16:00etatik 19:00etara.