Komun publiko berria izango dugu Zubiaurre goialdean

Zerbitzua apirileko azken astetik aurrera egongo da erabiltzeko moduan

Automatikoki garbitzen den komun publiko berria izango dugu laster Zubiaurre kaleko goiko aldean, Okin Zuri auzoan. Mota honetako herriko zazpigarren komuna izango da, eta Zubiaurre 52-54ko haurren parkean kokatuko da, asteroko azoka txikia egiten zen gunean eraikitzen ari diren etxebizitzen aurrean.

Olprim Ingeniería y Servicios enpresa esleipendunak kabina bere lekuan jarri du jada, eta komunaren elektrizitate- eta ur-konexioak prestatzeaz arduratu da. Datozen egunetan igeltserotzako erremateak egingo dira zoladura eta kabina behar bezala integratuta eta jarrita uzteko. Obra honen aurrekontua, guztira, 50.408,60 eurokoa da.

Komuna apirilaren azken astean irekitzea aurreikusten da, hilaren 25etik 29ra bitartean.

Instalazioaren ezaugarriak

Gure herrian dauden gainerako komunen antzera, kabina berri hau altzairu herdoilgaitzezko bloke bakarrekoa da, oin karratukoa. Kanpoaldean, hiru pixatoki daude, automatikoki garbitzen direnak. Kabinaren barruan komun bat, paperontzia, konketa, lehorgailua, zintzilikagailua eta ispilua aurkituko ditugu. Komunak ezinduentzako laguntza-barrak ditu. Komunak erabiltzeko muga-denbora izango du, eta erabiltzailea instalaziotik irten bezain laster, guztia automatikoki garbituko da hurrengo erabileraren aurretik.

Komun berri horrekin, gure hirigunearen zati handi bat bide publikoan izan ditzakegun behar fisiologikoei erantzuteko ekipamenduz hornituta dago. Udalerrian dagoeneko erabilgarri dauden sei bainuak honako hauek dira:

• Karabixa, haur parkearen ondoan (2015)
• San Pelaio, parkeko sarreran (2015)
• Errotabarri, plazatxoaren eta haur parkearen inguruan (2015)
• Ongarai, eguzkia hartzeko eta ur-jolasen gunean (2015)
• San Lorentzo (Gipuzkoa Etorbidea),autopistako sarrera zaharraren gunean, haur parkera sarreran (2019)
• Berdintasunaren Pasealekua, tren geltoki ondoan (2019)