Bizkaiako MAEk dirua bilduko du gaur kalean minbiziaren aurka ikertzen jarraitzeko

Minbiziaren aurkako Bizkaiko Elkarteak ohiko diru-bilketa egingo du gaur eta dohaintzak eskatuko ditu kalean

Bilboko Juan Mari Aburto alkatea eta Arkaitz Carracedo ikertzailea izan dira gaur goizean minbiziaren inguruan egindako ikerketaren alde udaletxe ondoan egindako ekitaldi sinbolikoaren buru. Arkaitz Carracedo CIC bioGUNEko Ikerbasque ikerketa-irakaslearekin batera, Bizkaiko 15 ikertzailek, 150 boluntario inguruk eta 200 ikaslek baino gehiagok hartu dute parte.

Herritarrok aukera izango dugu gaur gure dohainen bidez elkartearen lanari eta ikerketari babesa emateko, ohiko eske-kanpainaren esparruan. Gaur 39 mahai egongo dira Bilboko hainbat tokitan eta 1 Erandion. Egunean zehar 150 boluntario ingururen inplikazioa kontatuko dute, baita Bilboko 6 ikastetxetako 232 ikasle ere (Arangoya Hezkuntza Zentroa, Jesuitak Indautxu Ikastetxea, El Carmen Indautxu Ikastetxea, Nuestra Señora del Pilar Ikastetxea, Begoñako Andre Mariaren Ikastetxea eta Maristak Bilbao).

Gaur egun, Minbiziaren Kontrako Bizkaiko Elkarteak minbizia ikertzen duten 7 ikerketa-zentroren 23 proiektu babesten ditu, guztira 4,7M €.

Minbizi guztiak ez dira behar adina ikertzen

Gaur egun, emakumeen biziraupen osoa bost urtera %61,7koa da, eta gizonen kasuan, %55,3koa. Ikerketari esker, azken urteotan biziraupen-indizeak 2,6 puntu igo dira emakumeetan eta 3,3 puntu gizonetan, intzidentzia 2016tik %7,2 hazi den ingurune batean. Datu horiek gorabehera, Elkarteak aurrera egiten jarraitu nahi du, eta %70eko biziraupena lortu 2030ean. Beharrezkoa da minbizi guztiak ikertzea biziraupena handitzen jarraitzeko.

Ildo horretan, Arkaitz Carracedo doktoreak, Minbiziaren Kontrako Bizkaiko Elkartearen laguntzarekin, zuzendutako ikerketa-taldea prostatako minbiziaren metastasian inplikatutako mekanismoak bilatzen ari da, tumore horren metastasiaren balizko balaztak identifikatzeko.