Futbol 7 txapelketa solidarioa antolatu du Ermua Bluesek

Ermuan ospatuko da larunbat honetan, ekainak 4, Ander Moyaren Oroimenezko Futbol 7 Txapelketaren lehen edizioa. Ermua Blues kirol taldeak antolatu du jokalari ohiaren omenezko jarduera, eta izaera solidarioa izango du. Ander Moya 2021ean hil zen, 9 urte zituela, gaixotasun arraro baten ondorioz: DIPG edo enborraren berezko glioma lausoa. Horregatik, txapelketak irauten duen bitartean dirua bilduko da "Unidos contra el DIPG" elkartearentzat.

Txapelketa 09:00etan hasiko da Betiondoko kirol instalazioetan, eta bertan lehen urteko alebin mailako 24 talde – Eibar, Durango, Mungia, Iurreta, Basauri, Elorrio eta Bermeo, besteak beste – eta 300 haur baino gehiago bilduko dira sailkatze faserako. Goizeko jardunaldiaren ondoren, sailkatzen diren taldeek final-laurdenak, finalerdiak eta finala jokatuko dituzte 16:00etatik aurrera.

Txapelketarako sarrerak bi euroko kostua izango du, eta behin barruan, elikagaien saski bat zozketatuko da, euro baten truke salduko diren txartelen bidez. Bildutako guztia "Unidos contra el DIPG" elkartearentzat izango da.

Tratamendurik gabeko gaixotasuna

DIPG (enborreko berezko glioma lausoa) garun-enborreko tumore ohikoena da haurrengan, gizakiaren zati oso sentikorra eta bizia. Garapeneko tumore gehienetan bezala, ez dakigu zergatik zelula gaizto horiek garun-enborra modu zehaztugabean inbaditzen duten. Ohikoagoa da 5-10 urte bitarteko haurrengan, eta sintomak nahiko bereizgarriak dira: alterazioak aurpegiaren mugimenduan, irensteko eta ibiltzeko arazoak eta indarrik eza besoetan edo hanketan. Sintoma horiek aste gutxitan etortzen dira, eta, zoritxarrez, oraindik ez dago gaixotasun hori sendatzeko tratamendurik.

Radio Eibar – Cadena Ser irratiak Ander Moyaren gurasoak, Joana eta Igor, eta Juan Carlos Abascal alkatea elkarrizketatu ditu. Elkarrizketa osoa hemen entzun dezakezu.