Zinez beteriko astea 'Ali & Ava' eta 'La vida padre' filmekin

Ermua Antzokian lau pelikula berri ikusi ahal izango dira asteburu honetan, ostegunetik astelehenera. Zineklubean, Arantza Santestebanen 918 gau dokumentala izango da ikusgai. 2007ko urriaren 4an, Arantza, filmaren zuzendaria, atxilotu eta espetxera eraman zuten. Egun haietako oroitzapen batzuk gordetzen ditu: patioko buelta amaigabeak, igeriketa txapelketak, Rasharen kartzelako bidaia. 918 gau preso igaro ondoren, Arantza aske geratzen da. Une horretatik aurrera, bere oroitzapenak eta zalantzak grabagailu batean erregistratzen ditu, eta horiek filmean zehar zabaltzen dira, memoria zatikatu gisa. 918 gau 20:30ean emango da euskaraz, gaztelaniazko azpitituluekin.

Zinema komertziala larunbatean hasiko da, 19:30ean, Clio Barnardek zuzendutako Ali & Ava drama erromantikoaren lehen saioarekin. Hainbat arrazoirengatik, Ali eta Ava bakarrik sentitzen dira. Sofiaren bitartez ezagutzen dute elkar, Avak zaintzen duen Aliren maizter eslovakiarren alabaren bitartez. Hortik aurrera eta hilabete batez, lotura sakon bat hasten da haien artean hazten, Avaren aurreko harremanaren ondorioak eta Aliren nahasmen emozionala gorabehera; eta hori guztia bien musikarekiko grinak elikatzen du. Ali & Ava astelehenean ere proiektatuko da, 20:30ean.

Asteko bigarren film komertziala Joaquin Mazonen La vida padre izango da, Karra Elejalde eta Enric Auquerekin egindako komedia. Mikelek, sukaldari gazte eta handinahiak, duela hogeita hamar urte desagertu zen aitaren ustekabeko bisita jasoko du. Bere jatetxearen etorkizunerako une kritiko batean, Mikelek bere gain hartu beharko du Juan zoro eta ustekabekoaren ardura, benetako bizitasun urakana, sukaldaritzari eta bizitzari buruzko ideia guztiak kolokan jarriko dituena. La vida padre larunbatean 22:00etan eta igandean 19:30ean izango da ikusgai.

Haurrentzako zinemari dagokionez, igandean 17 00etan DC Supermaskoten Liga animaziozko zinta eskainiko da. Krypto Supertxakurra eta Superman lagun banaezinak dira, superbotere berberak dituzte eta elkarrekin borrokatzen dute Metropoliseko krimenaren aurka. Superman eta gainerako Justizia Liga bahitzen dituztenean, Kryptok aterpetxe bateko talde anizkun bat konbentzitu behar du – Ace txakurra, PB txerritxoa, Merton dortoka eta Chip katagorria – bere botere berriak menderatu eta superheroiak erreskatatzen laguntzeko.