Ermuko bi enpresa ETE berritzaile gisa akreditatu dira

Lau eskualdetako hogeita hamazazpi (37) enpresak jaso dute gaur Hazinnova ziurtagiria Amorebieta-Etxanon egindako ekitaldi batean: Durangaldeko 22 eta Markina-Ondarruko, Arratia-Nerbioiko eta Gernika-Bermeoko, 5na hurrenez hurren.

Hazinnovak doako aholkularitza-zerbitzua eskaintzen die Euskadiko enpresa txiki eta ertainei (ETEi) berrikuntza ez-teknologikoari dagokionez, lehiakortasuna areagotzeko.

Hazinnova programari esker euren berrikuntza-proiektua arrakastaz ezarri duten Durangaldea, Markina-Ondarroa, Arratia-Nerbioi eta Gernika-Bermeoko hogeita hamazazpi (37) merkantilek enpresa berritzailearen ziurtagiria jaso dute gaur, Innobasque-Berrikuntzaren Euskal Agentziaren, SPRIren eta Eusko Jaurlaritzako Ekonomi Garapen, Jasangarritasun eta Ingurumen Sailaren eskutik. Ziurtagiria jaso duten enpresa horiek berrikuntza ez teknologikoko mikro-proiektuak abiarazi dituzte beren erakundeetan merkatuan duten posizioa hobetzeko. Akreditazioa eskuratu duten enpresa ermuarrak Soldadura Lagunar eta Talleres IMAG, S.A. dira

Ziurtagiriaren banaketa-ekitaldia gaur goizean egin da Zornotzako Zelaieta zentroko auditorioan, eta bertan izan dira Aitor Urzelai, SPRI taldeko zuzendari nagusia, eta Leire Bilbao, Innobasque-Berrikuntzaren Euskal Agentziaren zuzendari nagusia.

Jardunaldian zehar ETEekin batera izan dira berrikuntzako mikro-proiektuen ezarpen-prozesuan laguntzen izan dituzten sareko eragileen ordezkariak: Hegan, FVEM, AED, Errota Fundazioa, Gorbeialde, Bilboko Merkataritza Ganbera, Azaro Fundazioa, Habic, Lanbide Ekimenak, Fundizio Klusterra, Konfekoop eta Ermuko Udala.

Ziurtagiri hau gaur jaso duten Durangaldea, Markina-Ondarroa, Arratia-Nerbioi eta Gernika-Bermeoko ETE horiek 48 proiektu gauzatu dituzte Hazinnova programaren 2021eko deialdiaren baitan. Proiektu horien bidez berrikuntza hedatu dute produktuan eta negozio-prozesuetan, fabrikazio, logistika, merkaturatze, administrazio edo finantzak bezalako ataletan.

2021eko deialdian, EAEko 209 enpresak parte hartu dute 2.300.000 euroko aurrekontua duen eta Ekonomiaren Garapen Sailak, SPRI Taldeak eta Innobasquek bultzatzen duten programa honetan.