Aitor Hernandezek Zornotzako ziklo-krosa irabazi du

Aitor Hernandez (Ermua Innpulso) txirrindulariak irabazi zuen iragan larunbatean Zornotzako Ziklo-krosa, Euskadiko Txirrindularitza Federazioaren rankingerako lehen proba puntuagarria. Denboraldiko hirugarren garaipena da Hernandezentzat eta azaroa hasteko modu ezin hobea.

Txirrindulari ermuarrak gune lehorrak eta putzuz betetako beste zati batzuk tartekatzen zituen zirkuituan gailendu zen, lasterketaren erdian oinetakoarekin izandako gertakari baten ondorioz lehen postua galdu arren. Galdutako posizioak berreskuratu ondoren, lasterketaren burura itzuli zen eta, azkenean, besoak altxatuta gurutzatu zuen helmuga.

"Oso pozik nago denboraldia nola doan ikusita. Hiru garaipen azaro hasieran egonda oso kontuan hartu beharreko zerbait da eta oso harro sentitu behar. Lana oso ona izaten ari da eta negu osoan erritmo eta maila honi eutsiko diodalakoan nago. Motibazioa mantentzen dut, nahiz eta aurkarien maila ere oso altua izan podiumera igotzeko lehian jarraituko dut lasterketa bakoitzean", adierazi zuen Aitor Hernandezek kanpaina honetan lortutako hirugarren garaipenaren ostean.