Lehen Hezkuntzako 3., 4., 5. eta 6. mailako 30 bat ikaslek parte hartu dute gaur goizean Ermuko Pleno Txikian. Udalbatzako kideak ikasleekin bildu dira Agenda 30 proiektuaren baitan, ikasturte honetako gai nagusiari buruzko proposamenak entzuteko: energia alternatibo eta garbiak.

San Lorentzo, Anaitasuna eta San Pelaio ikastetxeetako ikasleek hainbat jarduera egin dituzte ikasturtean zehar, lehenik eta behin egungo egoera energetikoaren diagnostikoa lortzeko. Osoko Bilkura Txikian lan horien ondorioak aurkeztu dira, baita haurrek Ermuko argiztapen eta kontsumo energetikoari buruz egin dituzten proposamenak ere. Era berean, ikasleek konpromiso batzuk hartu dituzte.

Udalari egindako ekarpenen artean, honako hauek nabarmentzen dira:

• Eraikin publikoetan ibilgailu elektrikoak kargatzeko puntuak instalatzea
• Kaleko argiak eguzki-panelen bidez kargatu ahal izatea
• Ikastetxeetako argietan pizte-/itzaltze-sentsoreak instalatzea
• Herritarren artean energia aurrezteari buruzko sentsibilizazio-kanpaina bat bultzatzea
• Faroletako bonbilla guztien ordez LED argiak jartzea
• Herriko gunerik ilunenetan farola gehiago jartzea
• Berdeguneak eta eraikin jasangarriagoak sortzea

Era berean, Pleno Txikiko parte-hartzaileek kartelak jartzea proposatu diote Udalari, herritarrek etxebizitzetan dituzten egungo argiak LED argiekin ordezka ditzaten animatzeko.

Saioa streaming bidez eman da zuzenean, eta laster webgune korporatibo honetan eta YouTubeko kanal ofizialean ikusi ahal izango da.

Eskolako Agenda 30 Debabarrenan

Debegesa Eskualdeko Garapen Agentziak duela 20 urtetik bultzatzen eta koordinatzen du Eskolako Agenda 30 Debabarrenan, udalekin eta Ingurugelarekin lankidetza estuan. Hezkuntza-komunitateari zuzendutako ingurumen-hezkuntzako programa honek hainbat helburu ditu:

• Ikastetxeak ingurumen- eta gizarte-arloko jardunbide egokien eredu bihurtzea.
• Inguruko gizarte- eta ingurumen-arazoak identifikatzeko eta horiei irtenbidea emateko gai den ikasleria prestatzea.
• Kultura parte-hartzailea eta ingurunearekiko errespetuzkoa sortzeko heztea.