‘Ermua, Hiri Adeitsua Adinekoekin’ proiektuak 10 urte bete ditu adin guztientzako Ermua baten alde lanean

2026an hamar urte bete dira “Ermua, Hiri Adeitsua Adinekoekin” proiektua abian jarri zenetik. Hamar urte hauetan elkarlanean aritu dira, Ermua herri atseginagoa eta adin guztientzako inklusiboagoa izan dadin.

“Ermua, adin guztientzat” da hamargarren urteurrena ospatzeko aukeratutako leloa, eta proiektuaren ibilbidea gidatu duen helburua laburbiltzen du: pertsona guztiek, beren adina edozein dela ere, herrian parte hartu eta beren bizitza-proiektua erabat garatzeko aukera izan dezaten lan egitea.

Ibilbide honetan, “Ermua, Hiri Adeitsua Adinekoekin” proiektuaren Talde Eragileak funtsezko zeregina izan du. Besteak beste, beharrak identifikatzen, proposamenak egiten eta adinekoen ikuspegia udal-bizitzaren hainbat esparrutara eramaten parte hartu du.

Hamar urteko ibilbidea elkarrekin

Urteurrena dela eta, parte-hartzea eta sentsibilizazioa sustatzeko hainbat ekintza egiten ari dira. Horien ardatz nagusia adinkeriari buruzko hausnarketa izan da, hau da, adinarekin lotutako estereotipo, aurreiritzi eta diskriminazioen inguruko hausnarketa.

Joan den urriaren 1ean, Adinekoen Nazioarteko Egunean, Talde Eragileko kideek, Ermuko alkatearekin batera, pankarta bat jarri zuten Udaletxeko balkoian. Ekintza horren bidez, egun horren garrantzia ikusarazi eta adinekoek baldintza berdinetan parte hartu eta erabakiak hartzeko aukera izango duten udalerria eraikitzen jarraitzearen garrantzia nabarmendu nahi izan zen.

Horrez gain, joan den urriaren 6an, Talde Eragileak azken hamar urteotako ibilbidea aurkeztu zuen Udaleko Informazio Batzordean, udaleko talde politikoen aurrean. Saioan, proiektuaren bilakaera partekatu, egindako lana balioetsi eta biztanleriaren zahartzearekin lotutako zenbait erronka aztertu ziren.

Topaketan, gainera, adinkeriaren aurkako manifestu bat irakurri zen, adinarekin lotutako aurreiritzien inguruan sentsibilizatzeko eta adinak pertsonen aukerak edo parte-hartzea mugatuko ez duen gizarte baterantz aurrera egiteko beharraren inguruan hausnartzeko. Manifestu osoa albiste honi erantsita dago.

Adinkeria, datozen jardueren ardatz

Hamargarren urteurreneko jarduerek aurrera jarraituko dute datozen asteetan, herritar guztiei zuzendutako hainbat proposamenekin. Besteak beste, adinkeriaren inguruko sentsibilizaziorako egindako egutegi bat banatuko da, horma-irudi bat sortuko da eta herritarren artean inkesta bat egingo da, Ermuko biztanleriak adinarekin lotutako estereotipo eta aurreiritziez duen pertzepzioa ezagutzeko.

Ekimen horien bidez, hausnarketa kalera eraman eta herritarrak eguneroko bizitzan egon daitezkeen egoera eta jarrera edadistak identifikatzera animatu nahi dira.

Hamargarren urteurren honen helburua ibilbide honen lana balioan jartzea da eta, aldi berean, adin guztientzako Ermua eraikitzen jarraitzea, adinekoen esperientzia eta ekarpena aitortuz eta errespetuan, parte-hartzean eta belaunaldien arteko berdintasunean oinarritutako bizikidetza sustatuz.

Proiektuak Bizkaiko Foru Aldundiaren laguntza ekonomikoa du, aurreikusitako jarduerak garatzen laguntzeko.