"Ermuachef" ekimenarekin hasiko da Gabonetako haur-kanpaina

Udal Kultura Sailaren Gabonetako haur-kanpaina larunbat honetan hasiko da, abenduaren 16an, jarduera goxo batekin: ErmuaChef. Ekimen arrakastatsu hau 5 eta 14 urte bitarteko haurrei zuzenduta dago, eta 16:30etatik 19:30etara egingo da Orbe Kardinala plazan. Merkataritza eta Ostalaritza Elkarteak (EMOE) antolatzen du sukaldaritza-tailer dibertigarri hau, eta bertan, parte-hartzaileek madalenak, txokolatezko piruletak, azukre-kotoia eta gailetak prestatzen ikasiko dute. Asteburu gozoari amaiera emateko, igandean, hilak 17, La Navidad en sus manos komedia proiektatuko da 17:00etan Ermua Antzokian.

Datorren larunbatean, abenduak 23, haurrentzako ipuin kontaketa saioa izango da 17:30ean Lobiano Kultur Gunean Zuhaitzek dena dakite izenburupean.

Abenduaren 24an, igandea, Olentzerok eta Mari Domingi Txikik desfile alaia egingo dute Ermuko kaleetan zehar 11:00etatik aurrera Orbe Kardinala plazatik abiatuta.

Abenduaren 26tik urtarrilaren 4ra bitartean, Udal kiroldegiko kantxak Gabonetako Haur Parkea hartuko du 11:00etatik 13:00etara eta 16:00etatik 20:00etara. Puzgarriak, jumping-a, ohe elastikoak, ludoteka, jolasak, bideojokoak eta tailerrak izango dira bertan gozagarri.

Urteko azken astean haurrentzako bi ikuskizun izango ditugu Ermua Antzokian: Marie de Jongh & Doos Kolektiboaren Esna, abenduaren 27an, 17:00etan, eta Glu Glu Produccionesen Loti ederrak, abenduaren 30ean, ordu berean. Urtarrila ere kultur ekitaldiz beteta dator, eta asteazkenean, hilak 3, Go!azen 10.0 gazteentzako kontzertuaren bi emanaldi izango dira (16:00etan eta 18:00etan).

Abenduaren 31n, igandea, 18:00etan hasiko da Olentzeroren kalejira Orbe Kardinalaren plazan, eta urtarrilaren 5ean Errege Magoen kabalgataren txanda izango da, 18:00etan San Lorentzo ikastetxetik abiatuta.

Programa osoa lerro hauen azpian kontsulta dezakezu.