Ermuko Hiri Agenda Txikia ikastetxeetara iritsi da

Ermuko Udalak herriko Hiri Agendaren bertsio oso berezi bat argitaratu du. Hiri Agenda Txikia da, 5 eta 10 urte bitarteko haurrei zuzendutako tresna, jolastuz ikasten duten bitartean Ermua bizitzeko leku hobea izan dadin aktiboki parte hartu ahal izan dezaten.

Beatriz Gamiz jarduneko alkateak ekimen berri hau aurkeztu die udalerriko Lehen Hezkuntzako ikastetxeetako ordezkariei. Tresna hau koaderno koloretsu bat da eta Espainiako Hiri Agendaren eta Ermuko Hiri Agendaren helburu estrategikoei buruzko informazioa eskaintzen du. Natu, Hiri, Klima, Argi, Ibil, Bizi, Txanpon, Etxe, Tekno eta Udal pertsonaia dibertigarrien bidez, Hiri Agendaren ardatz nagusiak jorratzen dira: paisaia eta lurraldea, hiri-eredua, klima eta ingurumena, hondakinen eta baliabideen kudeaketa eraginkorra, mugikortasuna eta garraioa, gizarte-kohesioa eta aukera-berdintasuna, ekonomia, etxebizitza, digitalizazioa eta gobernantza.

Ikasteko eta ekarpenak egiteko modurik onenetako bat jolastea da; horregatik, hainbat jarduera proposatzen dira agenda honetan zehar. Proposamen hauei esker, haurrek, alde batetik, Ermuko Hiri Agendaren helburuak ulertu ahal izango dituzte, eta bestetik, herrian martxan dauden edo burutzekoak diren proiektuetako batzuk ezagutuko dituzte.

Hiri Agenda Txiki honetan haurrei proposatzen zaien jardueretako bat Ermuko Udalarekin eta Alkatearekin harremanetan jartzea da, edozeri buruz dituzten ideiak kontatzeko, hala nola kaleak hobetzea, parke gehiago egitea, zahartuta dauden eraikinak margotzea eta beste hainbat. Iradokizun horiek Abiapuntuko atean jarri den postontzian utzi ahal izango dira, Hiri Agenda Txikian horretarako prestatu den atala betez. Posta elektronikoz ere bidali ahal izango dira alcaldia@udalermua.net helbidera.

Agenda, erabat elebiduna, 5 eta 10 urte arteko ikasle guztiei banatuko zaie ikastetxeen bitartez, eta modu autonomoan lan egin dezakete, edo irakasleen edo gurasoen laguntzarekin. Helduek tresna haurrekin lantzeko jarraibideak dituzte agendan bertan, eta gidarekin batera "irakaslearen gida" bat ere banatuko da, irakasgai bakoitza osatzeko eta sakontzeko baliabide pedagogikoak eskainiko dituena.

Zortzigarren Haurren Kontseiluaren lehen pausoak

Hiri Agenda Txikia aurkezteko bileran, Hiri Hezitzailea proiektu estrategikoko teknikariek eta Solasgune enpresako dinamizatzaileek zazpigarren Haurren Kontseiluko haurrek egin duten lanaren memoria ere aurkeztu dute. Kontseiluko hamalau kideek 2023/2024 ikasturtean Ikaskuntza Esperientzialaren erronkari ekin diote.

Politika horren garapenean, kontseilariek lau ardatz nagusi antzeman dituzte: jolastea, ezagutzea, harremantzea eta bizitzea. Ideia horietatik abiatuta, saioetan zehar proposamenak identifikatu dituzte, eta horietatik bi lehenetsi dituzte: ibaia ezagutzea eta bertan jolastea, eta pijamen festa handi bat antolatzea.

Urrian hasiko da Haurren Kontseiluaren ikasturte berria, zortzigarrena, eta azken hilabeteetan egindako lanari jarraipena emango dio. Datozen egunetan egingo da Lehen Hezkuntzako bigarren mailako ikasle ermuarren artean taldekide berriak aukeratzeko zozketa, eta asteazkenean, urriak 23, bilduko dira guztiak Alkatetzatik planteatuko zaien erronka berria lantzen hasteko.