Jubiletxeak 'txitxiburduntzi eguna ospatuko du bihar

Herriko jubilatu eta pentsiodunen elkarteak, "Jubiletxe Ermua" delakoak,  hainbat ekintza antolatu ditu bihar "Txitxiburduntzi Eguna" ospatzeko. Garai batean, Euskal Herriko hainbat lekutan gauzatzen zen tradizio hori, Garizuma baino lehen, hau da Inauteriko igandearen aurreko igandean, hain zuzen ere. Egun horretan, sua egiten zen mendian, eta bertan erretzen zituzten haragia ("txitxi"), txorizoa, txistorra eta sarraskiaren beste produktu batzuk, makila batean sartuta ("burduntzi" edo "burruntzi"). Inauterietako jaiei hasiera eman ohi zaie hainbat lekutan eta Ermuan "eguen zuri" baino astebete lehenago ospatuko da.

Jubiletxeak antolatutako jarduerek kirola, natura, gastronomia eta kultura herrikoia uztartuko dituzte, eta ibilaldiak egingo dituzte herriko ingurune naturalean zehar; horrez gain, petanka, igel jokoa eta "tute" txapelketak egingo dira "martxoaren 8ko’ plazan, 11:30etik 14:00etara. Era berean, makila batean sartutako txorizoak erreko dituzte txingarretan. Bazkideei errazioak eskainiko dizkiete 2 euroren truke (txorizoa, ogia, ura edo ardoa) eta 4 euroren truke bazkide ez direnei. Txartelak elkarteko bulegoan erosi ahal izango dira, gaur eguerdira arte.

Eguna hasteko, bi ibilbide egingo dira Ermuan eta inguruetan zehar. Lehenengo talde bat paseoan joango da Aixolako presaraino eta bigarren talde batek ibilbide laburragoa egingo du herrigunetik. Bigarren talde honetan boluntarioak egongo dira, tokiko interes guneak identifikatu eta gure historiako pasarteak kontatzeko. Parte hartu nahi dutenek Pasialekuko sarreran bildu beharko dute goizeko 9etan.

"Martxoak 8" plazan izango dira eguneko gainerako jarduerak. 10:00etatik 14:00etara, bikoteka petankan jokatzeko aukera egongo da. Bikoteak zelaian osatuko dira eta partidak 7 puntura izango dira. Partida bakoitzeko bikote irabazleari Txitxiburduntzirako tiketa bat oparituko zaio. Arratseko 3etan hasiko da tute txapelketa, jardueran izena eman duten pertsonen artean.