Orkatz gazte bat jaso dugu Ermuko kaleetan

Orkatz gazte bat herrigunera jaitsi da gaur Ermuan. Animaliaren atzetik hainbat txakur joan dira, eta, zaunkekin izututa, Gipuzkoa Etorbideko ile-apaindegi batean bilatu du babesa, goizeko hamaikak pasa izan direnean. Jabeak eta bezeroek, eszenarekin txundituta, ez zioten sinesgarritasunik ematen beren begiek ikusten zutenari. Ugaztunak aukeratutako establezimenduaren ondoko taberna batean zeuden bi gizonek animalia harrapatzea lortu dute eta Udaltzaingoari deitu diote.

Patruila bertaratu denean, animalia jaso eta udal-instalazioetara eraman du. Han ura, frutak eta atseden leku bat eman dizkiote, txakurren baten hozkadaren ondorioz zauri txikiren bat baitzuen. Udaltzaingoak Foru Aldundiko Natura Ingurunearen eta Nekazaritza Saileko Ehiza Fauna eta Arrantza Zerbitzuari eman dio harrapaketaren berri. Zerbitzuko teknikari bat Ermura etorri da eta une honetan, orkatza Gorlizko Fauna Basatia Berreskuratzeko Zentrora doa. Bertan, baloratu eta artatuko dute, animaliak naturara itzultzeko eta naturan bizirauteko behar dituen ahalmen guztiak berreskura ditzan.