Txirrindularien Udaberri Kopako azken proba izango dugu Ermuan

ETXE Ermuko Txirrindulari Elkarteko kirolari benjaminek, alebinek eta infantilek Udaberri Kopako azken proban parte hartuko dute igande honetan, hilak 23, gure herrian bertan. Martxotik ekainera bitartean sei proba egin ostean, Bizkaiko Federazioaren Txirrindularitza Eskolen errepideko txapelketa zazpigarren lasterketa honekin amaituko da.

Markina, Durango, Sondika, Igorre, Berango eta Karrantzatik igaro ondoren, Ermuak Udaberri Kopako egutegiari amaiera emango dio 10:30ean hasiko den kirol festarekin. Kopa honetako probetan, infantil kategoriako parte-hartzaileek azken sailkapenerako kontuan hartu beharreko puntuak lortu dituzte, eta txikienek, berriz, sailkapenik gabeko ibilbide politez gozatu dute.

Lasterketez gain, Orbe Kardinala plazan 5 eta 14 urte bitarteko umeentzako gymkana herrikoia izango da 11:00etatik aurrera, eta eguna amaitzeko, Alberto Lasuen ermuarra, ETXEren eta herriko txirrindulari eskolaren sortzailea, omenduko da 13:00etan.