‘Zaintzak erdigunean’: zeharkako jardunaldia hausnarketa partekatua egiteko

Udaleko Berdintasun Arloak 'Zaintzak erdigunean' jardunaldia gauzatuko du azaroaren 4an: oraina eta etorkizuna etxeko eta zaintzako langileen egoera soziolaboralean. Etxeko langileen eta zainketen eskubide soziolaboralen aintzatespenean arreta jartzeko aukera izango da, baita haien arreta eta babesa bermatzen lagunduko duten egungo baliabideak eta neurriak ezagutarazteko aukera ere. Jardunaldia doakoa da eta aldez aurretik izena eman behar da. Informazio gehiago nahi izanez gero, jo Emakumearen Topagunera edo deitu 943 17 10 30 telefonora.

Hainbat arlotako adituek etxeko lanen eta zainketen arloko egungo eta etorkizuneko erronkak hizpide izango dituzte; gizartean funtsezkoa den gai horri buruzko kontzientziazioa sustatuko dute. Zainketak funtsezko lana dira, baina zeregin hori ezkutuan dago, isilpean, eta ekonomikoki prekarioa da. Horrek eragin nabarmena du sektorean gehiengoa diren emakumeengan.

Azaroak 5: Zaintzaileen Nazioarteko Eguna.

"Jardunaldiak etxeko langileen eta zaintza pertsonalen egoera soziolaborala hobetzearen garrantzia eta beharra nabarmenduko du, eta elkarrizketarako gune bat sortuko du, eremu profesional horretan konponbideak eta aukerak aztertzeko. Hori guztia, generoa, migrazioa eta emakumeen garapen soziolaboralean eragina duten beste ardatz batzuk bezalako atalen arteko azterketatik abiatuta ", Beatriz Gamíz Berdintasun zinegotzi eta alkateordearen hitzetan.

Jardunaldian parte hartuko dute Karmele Acedok (SSI Gizarte Zerbitzu Integratu Kooperatiboak taldeko gerentea), Claudia Ramosek (Ermuko Etxeko Langileen Elkarteko presidentea), Oskar Velliscak (Lan-zuzenbidean eta atzerritartasun-zuzenbidean abokatua) eta Gisella Bianchik (Errotik Kooperatiba Feministako genero eta zaintzan aditua den soziologoa).

Gonbidatuek etxeko sektorean lan egiten duten emakumeen kolektiboak dituen erronkak eta aukerak aztertuko dituzte, bai eta mendekotasuna duten pertsonei ematen zaien laguntza ere, prestakuntzaren, gizarte zibileko erakundeen aktibismoaren, ikerketaren eta lan- eta administrazio-egoeraren ikuspegitik.

Jardunaldi hau interesgarria da publiko orokorrarentzat eta, bereziki, etxeko eta zaintzako langileentzat, bai eta zerbitzu profesional horiek erabiltzen dituztenentzat ere.