Ipuin kontalariaren bigarren saioa

Udal liburutegiak ‘Kontu kontari’ lemapean aurtengo ikasturterako antolatu duen ekimenak aurrera jarraituko du eta hilabete honetako saioa datorren larunbatean –otsailaren 4an- egingo da. Proiektuaren xede nagusia literatura haur eta gazteengana helaraztea da, kasu honetan, ahozko literatura izango delarik, ipuin kontalarien bitartez. Larunbateko saioa Maite Frankok egingo du. Ikuskizuna arratsaldeko bost eta erdietan hasiko da liburutegiaren barne, haurrentzat prestatu eta egokitutako aretoan. Saioa aproposa da 5 urtetik 9ra bitarteko gaztetxoentzat.

Saioak dohainik izango dira eta interesdunek ez dute aldez aurretik izenik eman beharko. Horien iraupena ordu betekoa izango dela aurreikusi da eta aldez aurretik zein adinarentzat den egokia iragarriko. Nolanahi ere, aurtengo saio ia gehienak 5 urtetik 10era bitartekoentzat antolatzea aurreikusi da. Antolatzaileek eragozpenik ez daitezen sortu, parte hartzaileei puntualtasuna eta isiltasuna eskatu diete.

Proposamen berri honen helburuak anitzak dira eta horien artean ondokoak aipa genitzake: haur liburutegia dinamizatzea ahozko tradizioari jarraiki; narratiba gazteenei helaraztea eta, larunbat arratsalderako aukera ezberdin eta bestelako batean bilakatzea. Ekimenaren bidez irakur zaletasuna suspertzeaz gainera, partaideen irudimen eta sormena ere landuko dira.