Sustapen bideo batean agertuko da udal liburutegia

Eusko Jaurlaritzako Kultura Sailak bideoa prestatu eta plazaratuko du ‘Liburutegiak topagune’ kanpainaren barne. Sustapen bideo horrek udal liburutegiak kultur integraziorako topagune aproposak direla azpimarratu nahi du, etorkinei liburutegiak ezagutarazi eta hurbiltzeaz gain. . Bideo horretan Bilbo, Gasteiz eta Ermuko liburutegiak agertuko dira. Irudien grabazioari Ermukoan eman zaio hasiera, hain zuzen ere, aurreko astean eta honakoan. Aipatu kanpaina liburutegiaren nazioarteko egunean hasi eta immigranteen egunera bitartean, hots abenduaren 18ra arte mantenduko da.

Grabazio lehen egun horretan kontrataturiko enpresaren langileak Ermura etorri zitzaizkigun. Gure udal liburutegian erabiltzaile immigrante hainbat elkarrizketatu zituzten eta zerbitzuko lan egun bat nolakoa den grabatu zuten. Eguna izatez berezia zen, eta liburutegian hainbat jarduera gauzatu zirenez, horiek ikusi eta grabatzeko aukera izan zuen etorritako ekipoak. Horien artean, immigranteentzat espreski prestatutako bisita gidatua eta helduentzako ipuin kontalariaren saio, hurrenez hurren. Ekitaldi bietan kamerak egon ziren, gertatutakoa jasoz.

Aipatu DVD horrek Bilboko San Frantzisko liburutegiko, Gasteizko Inazio Aldekoa liburutegiko eta Ermuko zerbitzuko irudiak bilduko ditu. Emaitza, aukeraketa eta muntaia egin ondoren ikusi ahal izango ditugu laster, Eguberriaren ondoren Euskal Herriko udal liburutegi guztietara banatuko baita.