‘2010eko Oporrak’ argazki lehiaketaren irabazleak erabaki dira

Gazteria sailak ‘2010eko Oporrak’ tituluko argazki lehiaketan irabazle suertatu diren pertsonen zerrenda ezagutarazi du. Aurtengo edizioan saria nagusia Berrizera joan da. Garailea, Asier Cosme López argazkilaria izan da. Honek koloretako eta Meca hondartza tituluko argazki batekin gailendu da, epaimahaiak emandako puntuetatik gehienak lortu eta gero. Bertan, hiru bizikleta ikusten dira hondartzan ilunabar oso polita izan zuen arratsa batean, eta kolore gorri, laranja eta horiak nagusi direlarik. Irabazleak, sari gisa 300 euro eskudirutan jasoko du.

Herriko artista onenaren atalean, saria Elena Hernández Amadorri egokitu zaio, berea izan baita herrikoen artean sailkapenean puntu gehien lortu duena. Honek bidalitako argazkietatik, Marokoko Chefchaouen herrian ateratako bat aukeratu da, bertan horma horixka batean kolore ezberdinetako hamar txilaba zintzilik daude. Ermuar honek ere sari gisa 300 euro eskudirutan hartuko du. Azkenik, esan behar 14 urtetik 18ra bitarteko argazkilari gazteen atalean saria Andoni Rivera Pintori egokitu zaiola. Honek Consuegra (Toledo) herrian hartutako argazkia aurkeztu du. Bertan haize-errota bi ikusten dira behe lainoz argia urratu zuen goiz batean. Lehiaketara berrogeita hiru argazki aurkeztu dira, oso txukunak eta teknikoki maila onekoak. Horren erakusgarri, lehen aukeraketaren ondoren hainbat irudi sailkatu direla bigarren txandarako da. Horiei modu anonimoan kide bakoitzak puntuak emanez, esleitu ditu epaimahaiak aurtengo sariak.

Lehiaketa hau gazteria informatzeko bulegoak antolatu du, Bizkaiko Foru Aldundiaren babesarekin eta gure udalaren laguntzarekin.