Zeharkaleko bide-seinale berrien azken ukituak

Aste honetan seinale berriak jartzeko lanak egin dira Zeharkalen, bai eta kaleko zirkulazioa antolatzeko eta bertan aparkatzeko aldaketen berri ematen duten bide-markak berritu eta pintatu ere.

Zeharkalen zeuden hiru zamalan-guneetatik bat mantendu da: DIA supermerkatuaren aurrean dagoena. Zamalanetarako ezarri den ordutegia ibilgailuei aparkatzea debekatu zaien ordutegi bera da, hots, 8:00etataik 20:00etara, astelehenetik ostiralera, jaiegunetan izan ezik. Modu horretan trafikoa kaltetu dezaketen gorabeherak saihestuko dira, hala gertatuko litzake-eta bi ordutegiak ezberdinak balira eta 20:00ak baino lehen zamalan-gunean autoak aparkatzea baimenduko balitz.

SCHLECKER dendaren parean zegoen zamalan-gunea Ursolo zeharbidearen ezkerraldeko espaloira eraman da, Zeharkaleko zirkulazioaren jariotasuna hobetzeko, zirkulazio hori oztopa dezaketen elementuak ahalik eta gehien murriztuz. Zamalan-gune horren jarduera-ordutegia 8:00etatik 13:00etara izango da astelehenetik ostiralera, eta 8:00etatik 12:00etara larunbatetan.

Kalearen hasieran, Zeharkaleko 4. atariaren parean dagoen zamalan-gunearen ordutegia jarraitua izango da: 8:00etatik 19:00etara astelehenetik ostiralera, eta 8:00etatik 12:00etara larunbatetan, bertan dauden saltokien beharrei erantzuteko eta Valdespinako Markesa kalearen inguruan dauden beste saltoki batzuentzat ere zerbitzu emateko, hor hurbil ez baitago zamalan-gunerik oraindik.

Ondorioz, handitu egin da zamalan-gune horretako espazioa, bi banaketa-kamioi bertan aldi berean egoteko moduan. Hartara ez da, orain arte bezala, bigarren ilaran kamioirik egongo, Kaltxangoko bide-gurutzera eta inguruetara arte auto-ilara luzeak sorraraziz.

Bestalde, metro batzuk mugitu dira Mallabirako noranzkoan dagoen espaloi-hasierako edukiontziak, etxebizitzetatik urruntzeko.

Bi zirkulazio-noranzkoak mugatzen dituen kale-erdiko marra eta Zeharkalek Kaltxangorekin egiten duen kantoian dagoen zebra-bidea pintatzea besterik ez da falta. Lan hori hamabost eguneko epean egingo da, gauez, zirkulazio gutxi dagoenean, auzokoei ahalik eta enbarazu gutxien egiteko eta ibilgailuen zirkulazioari kalterik ez egiteko.

• Arau haustearen abisu eredua