Euskara ikastea gure esku! Aukera paregabea Ermuan bertan

Uda eta oporrei jarraiki iraila datorkigu. Gauza on eta berri inguruko hausnarketa egiteko erabili ohi duguna. Denboraldi berriko jarduerak planifikatzeko unea: zaletasun, kirol, aisi….trebakuntza, ikastaro eta abar… Hizkuntzak? Noski, aukerakoa. Eskaintza zabala dugu eta horren barne, euskararena. Gurea eta propio dugun hizkuntzarena. Hori ikasi, sendotu edo hobetzeko aukera paregabea, gure herrian bertan. Aitzakiarik ez, euskarak merezi du, eta puntu! Oraingoan bai, ez etsi. Ez galdu aukera. Ermuan bertan, inora joan beharrik gabe, ordutegi zabala aukeran izanik, norberari egokitutako atentzioaz eta, noski, kalitatez. Galdetu; matrikulatzeko garaiz baitzaude.

Ermuko bi euskaltegiek hastear dagoen 2012-2013 ikasturterako matrikula zabaldu dute astean zehar. Matrikulazio aldia zabalik egongo da irailaren azkenera artean. Argibideak eta izen emateak zentro bakoitzeko idazkaritzan bertan egin daitezke. Udal Euskaltegiak jada kalean du eta banatzen hasi da aurtengo ikasturterako ezaugarrien berri ematen duten orria. Aurtengo kanpainarako leloa “Nik euskara maite dut” da.

Kaltxango AEK-k ere bere kanpaina prest du, atzokoan aurkeztu baitzuen Bilbon. “Euskara bizia” lelopea. Ikastegi biek eskaintza zabala eskaintzen dute. Iragarri dutenez EGA azterketa prestatzeko talde berezia sortzeko eta guraso, merkatari eta etorkinen talde bereziei eguerdiko eskolak emango dituzte. Euskaltegiek orotariko euskara ikastaroak eskaintzen dituzte 16 urteko gorakoentzat eta, eskaintza horren barne euskalduntze eta alfabetatzeko orotariko mailak daudelarik. Ikasleek matrikularen ordainketa bi zatitan egiteko eta bekak eta laguntza eskuratzeko aukera dute.

Bi euskaltegi ditugu Ermuan: udalarena Teresa Murgan, eta Kaltxango AEK-rena

Udal Euskaltegiak iaz bezala, eskolak astelehenetik ostegunera bitartean emango ditu, ostirala libre izanik ohiko ikastaroetako ikasleentzat. Erritmo estandarra egunean bi ordukoa izango da, nolanahi ere, aurreikusita daude beste erritmotako taldeak hartu eta eratzea. Talde horiek partaideen beharretara egokitutakoak izango dira eta, esaterako, guraso, langile etorkin edo merkatarien taldeak eratzea espero da. Eguerdiko eskolak ordu bi eta erdietatik lauretara bitartean emango dira, astean hiru egunetan. Ikasturte berri honetan aplikatuko den ikastorduaren prezio 1,24 €uro da, zerbitzua arautzen duen ordenantzan ezarritakoari jarraiki. Hori horrela, ikasleak izena ematen duen taldeak jasotzen dituen eskola orduen araberako kantitatea ordainduko du.

Bestalde, azpimarratzekoa da ikasturte honetan langabetuek, eta euskaltegian lehenengo aldiz maila baxu batean abiatzen diren ikasleek ere matrikula sariaren erdia baino ez dutela ordaindu beharko. Gainera, aurretik zeuden diru laguntzak ere mantendu egiten dira.

Kaltxango AEK

Herriko Kaltxango AEK-k ere matrikulazioa zabalik izango du irailaren azkenera bitartean izenak hartuko dituelarik. Ikastegiak ordutegi zabal eskaintzen du, goizez, eguerdiz, arratsaldez eta gauez. Kaltxango zentro homologatua da eta bertan maila guztiak eskainiko ditu: euskalduntzea, hasiera, oinarrizko, goi-maila eta EGArako bidea, hobekuntza, mintzapraktika, autoikaskuntza, IVAP-IRALE eta Berbalagun mintzapraktikarako ekimen osagarria. Zentroak gure udalaren eta Eusko Jaurlaritzaren diru-laguntzak jasotzen ditu. Argibideak eskatu eta izen-emateko Bizkai Etorbidearen 13 etxabeko egoitzan, kaltxango@aek.org posta elektronikoan 943 171940 telefonoan egin daitezke.