Mundialerako prestakuntza amaitutzat emango Hernandezek, Holandak bi proba korrituz asteburuan

Estatuko ziklokros txapelketa bigarrenez irabazi berri duen Aitor Hernández txirrindulari ermurrak Tabor hirian (Txekiar Errepublikan) jokatuko den Munduko ziklokros txapelketarako prestakuntzarekin segitzen du. Prestakuntzaren barne, asteburu honetan beste bi lasterketetan korritzea erabaki du, bere buruari exijitzen jarraitzeko. Bi probak Holandan korrituko ditu. Larunbatean Spacialized etxeak babesten duen ermuarrak Rucphen hirian izango da, C2 kategoriakoan lehiatzen. Igandean, berriz, ziklokroseko Mundu Kopan arituko da, Hoogerheide izena duen herrian.

Bidaiari ekin aurretik honako hitzak utzi dizkigu: “Asteburu gakoa izanen da, Mundialaren aurreko azkena. Larunbateko karrera eta herria ez ditut ezagutzen, ez eta bertan nortzuk egongo garen ere ez. Emaitza onenaren bila aterako naiz; lasterketa polita egiten saiatuz. Igandekoaz, Hoogerheide iaztik ezagutzen dut, bertan Mundiala izan baitzen. Ez dut zorrik, karrera eta eguna ezberdinak baitira. Lasaitasunez noa, egin beharreko lana eginda, betiko ilusio eta gogoz. Lehen hogeiren artean amaitzea helburua betetzea litzatekeela deritzot, nirea egitera aterako naiz, UCI puntuak lortzeko lan eginez, Mundialari begira abantaila izango baitira. Aurreko astebururako larregi entrenatu eta ordaindu egin nuen, oraingoan atseden gehiago hartuta noa eta igarriko dudala espero dut, aurretik bidaia luzea egin behar izanik ere”.