Era guztietako paellak dastatzeko aukera izango du Ermuak asteleheneko lehiaketan

Urtero bezala, uztailaren 27an, ''Zezen eguna'', koadrila, txaranga eta pertsona taldeentzat paella-lehiaketa ospatuko da Ermuan, eta janariaren usain gozoak lurrinduko ditu herriko kaleak.

Lobiano Gastronomi Elkarteak antolatu du beste behin paella-lehiaketa, Ermuko Merkatari eta Ostalarien Elkarteak lagunduta. Urtero gero eta talde gehiago animatzen dira bi kategorietan (haurrak eta helduak) parte hartzera; horretarako, hilaren 27an bertan, Orbe Kardinala plazako kioskoan izena eman beharko da 10:00etatik 12:00etara.

Parte hartzen duten taldeek bi amantal eta hamar mahaikideko arroz pakete bat jasoko dituzte; gainontzeko elementuak eurek jarri beharko dituzte, sukaldeko tresnak barne. 14:00ak arteko epea izango dute paella prestatzeko, egokien deritzoten osagaiekin. Izan ere, helburu nagusia jaietan parte hartzea eta lagun giroan bazkaltzea da.

Sari ederrak paella onenentzat

Lehiaketako epaimahaikideek 14:00etatik 15:00etara dastatuko dituzte aurkeztutako platerak, eta taldeei bina ardo botila, txorizoa eta saltxitxoia oparituko dizkiete parte hartzeagatik.

Aurkezpena, zaporea, testura eta beste hainbat parametro kontuan hartu ostean, epaimahaiak 19:00etan emango du erabakiaren berri, eta sari banaketa hasiko da. Paellarik onenaren egileek 500 euroko saria eta opari bat jasoko dituzte; bigarren sailkatuek, aldiz, 200 euro eta oparia.

2015eko Santixauetako paella-lehiaketaren oinarriak

Aurreko urteetan lehiaketaren inguruan sortutako jai-giroa ikus dezakezue beheko argazkietan: