Guztiok batera emakumeenganako indarkeriaren aurka

Emakumeen kontrako Indarkeria Ezabatzeko Nazioarteko Eguna dugu gaurkoa, eta Ermuan hainbat ekintza izango dira gaitz horren aurkako konpromiso aktiboa erakusteko.

Udalbatzak aho batez onartu zuen gaiaren inguruko instituzio adierazpena, pasatu den urriaren 28ko Informazio batzordean. Bertan, dagozkion eskumenen barruan, emakumeen eta gizonezkoen arteko berdintasunaren eta tratu onen aldeko udal politika aktiboak, osoak eta koordinatuak lantzeko zina egin du Ermuko Udalak.

Gainera, 19:00etan Orbe Kardinala plazan egingo den kontzentraziora gonbidatu ditu hiritarrak udal gobernuak. Udaleko Berdintasun Sailak antolatu du manifestazioa, indarkeria matxista gaitzetsi eta biktimei elkartasuna adierazteko.

Bestalde, iluntzean, barrutik lila kolorez argituko da udaletxea, argia kaleetatik ikusteko moduan. Udalak, era berean, puntu lilaren erabilera babestu du, emakumeen aurkako indarkeriaren sinboloa baita. Irudi hori publikoki erakusteak indarkeriaren aurkako konpromiso aktiboa erakusten du.

Beldur Barik sari banaketa

Arratsaldean, 18:00etatik aurrera, Ermuko Beldur Barik lehiaketako sari banaketa izango da Lobiano Kultur Gunean. Bi sari izango dira guztira, kategoria bakoitzeko onenari 300 euro, eta parte-hartzaile guztien lanak ikusteko aukera izango da.

Azaroaren 25eko ekintzen programa osoa, hemen. Manifestatu zaitez, esan ezetz emakumeen aurkako indarkeriari!