Herritarren parte-hartzearen erronken eta esperientzien inguruan murgildu da Ermua

Abian da Toki-Garapeneko Astearen XI. edizioa. Lehen egun honetan, “Herritarren parte-hartzearen erronkak eta esperientziak” izeneko hitzaldia izan da Izarra Centreko auditorioan entzungai izan den aurreneko gaia. Igor Ahedo partaidetza eta komunitate garapeneko unibertsitate Masterreko irakaslea izan da hizlaria, eta aurkezpen dinamiko baten bitartez, herritarren partaidetzaren inguruan duen ikuspuntua azaldu du.

Adibide praktikoak jarri ditu Ahedok ikus-entzuleei parte-hartze prozesuen xehetasunak erakusteko. Haren iritziz, ekimen horiek “hiritarren arteko sareak berpizten dituzte isolamenduaren aurrean segurtasuna sortzeko”. Euskal Herriko Unibertsitateko Zientzia Politikoen Saileko zuzendariaren arabera, berebizikoa da parte-hartze prozesuak “hezigarriak, berdintasunezkoak, eraldatzaileak eta sortzaileak” izatea.

Herritarren parte-hartzeak legitimazioa areagotzeko balio du, bai instituzioentzat, baita kolektiboentzat ere; eraginkorragoak izateko balio du, guztien interesaren alde lan egiten duen komunitatea sortzeko, desberdintasunak gainditzeko eta interes orokorrak indibidualen gainetik jartzeko. Horregatik, Ahedoren hitzetan, parte-hartzea eraiki behar da, bai gizartean, baita administrazioan bertan ere. “Ezin da Udala at utzita lan egin, elkarlanean aritu behar da prozesu kolaboratzaileetan. Prozesu on batek mundu guztia hartu behar du barne”, azpimarratu du.

"Ezinezkoa dena posible egitearen artea"

Parte-hartze prozesuek maila ezberdinak izaten dituzte, Ahedok azaldu duen moduan. Bost sakonera maila daude: informazioa, kontsulta, ko-erabakitze formula, erabakia eta ko-gestioa. “Ez dago bestea baino hobea den mailarik, benetan garrantzitsua dena prozesuaren azken helburua garbi izatea da”, zehaztu du. “Informazio mailan soilik gelditu gaitezke, baina aldez aurretik jakinda horixe dela azken xedea, bestela frustrazioa sortzen baita”.

Hitzaldia amaitzeko, UPV/EHUko irakasleak azpimarratu du errealitatea “gatazkatsua” dela eta politika, “ezinezkoa dena posible egitearen artea”, liskar horiek kudeatzen saiatzen dela aurreikuspen handiekin baina errekurtso mugatuekin. Izan ere, parte-hartzearen “ipuin” honen gakoa, Ahedoren hitzetan, “magia non dagoen jakitea” da.

Igor Ahedoren hitzaldiaren ostean, hainbestetan aipatutako parte-hartzea praktikan jarri da ikus-entzuleen artean, Manahmana Ermuko enpresako kideek dinamizatutako taldekako dinamika baten bitartez.

Lerro hauen azpian ikus dezakezue Igor Ahedoren hitzaldia osorik, baita bertako eta jarraian egindako taldeko dinamikako irudiak ere.