Isiltasunaren garrantzia gure eguneroko bizitzan

Zarataren eraginaren eta horiek ekiditearen inguruko tailer hezitzaileak antolatu eta babestu ditu Ermuko Udalak azken bi urteetan herriko zazpi ikastetxeetan. Ekintza horien helburua neska-mutilek kutsadura akustikoaren arriskuak identifikatzea, zarata murrizteko euren portaerak aldatzea eta kontzientzia berri hori helduen artean zabaltzeko gai izatea da.

Ekintza horiek izandako emaitza onak direla eta, urtarrilean kontzientziazio jarduerak egingo dira herriko kaleetan zehar, ikastetxeetan egiten diren tailerren babes eta gehigarri moduan.

Hortzmuga antzerki taldeko artista talde batek herritarrak sentsibilizatzeko ikuskizunak egingo ditu urtarrilaren 7an eta 8an Ermuko kale nagusietan. Antzerkiko teknikak, mimika eta eurek sortutako tresnak erabiliko dituzte aktoreek egun horietan, eta bidean topatzen dituzten pertsonekin arituko dira isiltasunaren garrantziaz kontzientziatzeko.

Bestalde, urteko lehen eskola astean zehar, konpainia bereko 2-3 artista joango dira Ermuko ikastetxe bakoitzera sarrera orduan, jolastorduan edota irteera orduan. Bertan, ikasleekin arituko dira lanean, eta molestatzen duten edota zarata eragiten duten jarreren aurrean atentzioa deituko diete.

Ekintza horiek guztiak isiltasunaren, errespetuaren eta tolerantziaren ikuspuntutik landuko dira. Ikasle guztiek ikastetxeetan ikusten dutena kalean eta familiarekin egoten diren espazioetan ere topa dezaketela erakustea da helburua.