Ermuak eraso sexisten aurkako gaitzespena erakutsi du

Udalak kontzentrazio deialdia egin du asteazken honetarako, martxoak 21, 19:00etatik aurrera

Ermuko Udalak erakunde adierazpena onartu du indarkeria matxistarekiko gaitzespen eta errefusik irmoenak publikoki agertzeko, egun emakume eta gizonen artean dagoen ezberdintasunaren ondorio besterik ez delako eta emakumeen osasun, duintasun eta askatasunaren kontra kalte larria egiten duelako.

Berdintasuneko Udal Kontseilua osatzen duten elkarteetako emakumeekin batera landu da adierazpena, eta urruntze-agindua hautsi eta gure herriko emakume bat biktima izan duen sexu-erasoa dela eta onartu da. Horrekin, gainera, biktimari erabateko laguntasuna erakutsi nahi zaio.

Ermua edozein motatako eraso sexistarik gabeko udalerri deklaratu da, eta hala izan nahi du. Hori horrela, Ermuko Udalak nahiz Berdintasuneko Udal Kontseiluak gure udalerrian izan den indarkeria matxista ekintza berri honen eta emakumeenganako indarkeria-jokabide ororen kontrako gaitzespena eta errefusa adierazi nahi dituzte.

Eraso matxisten aurkako kontzentrazioa

Inoiz edonolako indarkeria matxista jasan behar izan duten emakume guztienganako laguntasuna eta elkartasuna erakutsiz, Ermuko Udalak, Berdintasuneko Udal Kontseiluak eta Tratu Onen aldeko Plataformak kontzentrazioa antolatu dute asteazken honetarako, martxoak 21, 19:00etatik aurrera Orbe Kardinala plazan.

Ermuko gizon eta emakume guztiei dei egiten zaie gaitzespen jarrera berdinarekin bat egiteko topaketan, eta berdintasunaren aldeko borroka honetan aktiboki eta erantzukizunez parte hartzera animatu nahi dira herritar guztiak, pertsona guztioi dagokigun arazo sozial larri bat delako.