Guerrera juniorrak, President's Cupeko txapeldun

Imanol Alvarez entrenatzaile ermuarrak gidatzen duen Espainiako emakume juniorren eskubaloi selekzioa President’s Cupeko txapeldun izan da Hungariako 2018ko Munduko Eskubaloi Txapelketan.

Guerrerek, Mirene Moreno eta Anne Erauskin ermuarrak tarteko, hamazazpigarren postua eskuratzeko jokatu dituzte azken bi partiduak Hungarian. Izan ere, taldeen fasetik kanpo gelditu ziren pasatu den igandean izandako norgehiagoken ostean, bi garaipen (Egiptoren eta Kroaziaren aurka) eta hiru porrot (Suedia, Alemania eta Frantziaren aurrean) lortuta. Hori horrela, President’s Cup lortzeko lehian sartu ziren.

Txapelketako azken fase honetan, Angola eta Portugal izan dituzte aurrez aurre Guerrerek. Lehenengo partiduan larri-larri eskuratu zuten garaipena (31:32) talde afrikarraren aurka, eta Portugalen aurrean jarraian eskuratutako hirugarren garaipenari esker (28:32) President’s Cupeko irabazle izan dira, Hungariako Mundialeko sailkapen orokorrean 17. postua eskuratuz.

Imanol Alvarez hautatzaileak azaldu duenez, “hamazazpigarren postua ez da guk espero genuen emaitza, baina sentsazio onekin esango diogu agur Hungariari. Oso gustura nago neskek egindako lanarekin, kanpoan geratu izanaren kolpea eta gero, errekuperatu eta hiru partidu jarraian irabaztea lortu baitute. Eta hori, maila hauetan, ez da batere erraza”.

Hungaria da emakumezko juniorren XXI. Eskubaloiko Munduko Txapelketako egoitza, uztailaren 1etik 14ra bitartean. Imanol Alvarezen Guerrera juniorrek guztira zazpi partidu jokatu dituzte: bost D taldearen barnean (Frantzia, Suedia, Alemania, Kroazia eta Egipto izan dituzte aurrez aurre) eta beste bi President’s Cupen, Angola eta Portugalen aurka.