Oinarrizko Prestakuntzako udal Institutuak agerian jarri du 'Abian' azokan eskaintzen duen heziketa

ABIAN Lanbide Heziketa Azokaren laugarren edizioa hasi da gaur Eibarko Armagintza eskolako patioan. Azokak Debabarreneko Lanbide Heziketako zortzi ikastetxeetan eskaintzen diren heziketa ziklo eta prestakuntza-ibilbide ezberdin guztiak biltzen eta erakusten ditu, eskaintza zabala espazio bakar batean. Ikastetxe partaideak ondorengo Hajek dira: Armeria Eskola, IMH Makina Erramintaren Institutua, Meka Lanbide Eskola, Kardala Akuakultura Eskola, Mutrikuko Institutua, Uni Eibar-Ermua, Eibarko Oinarrizko Lanbide Heziketarako Udal Institutua eta Ermua-Mallabiako Oinarrizko Lanbide Heziketarako Udal Institutua. Inaugurazio ekitaldiaren buru izan dira Eusko Jaurlaritzako Enplegu eta Gazteriako sailburuordea, Marcos Muro, Gipuzkoako Ekonomia Sustapena, Landa Ingurunea eta Lurralde Orekako diputatua, Ainhoa Aizpuru, eta eibarko alkatea, Miguel de Los Toyos. Horiekin batera Debegesa sozietatearen presidente den Ermuko Juan Carlos Abascal eta horren kide diren eskualdeko alkate guztiak, gehi SD Eibar Fundazioko presidente Mikel Larrañaga.

ABIAN azoka martxoaren 29ra egongo da zabalik, ordutegia 10:00etatik 14:30era izanik egunero; eta ostegunean baita arratsaldez ere, 16:00etatik 18:30era. Erakusketa guneaz gainera, ABIAN azokak hitzaldiak eta doako tailerrak eskainiko ditu. Informazio gehiago Hemen ABIAN Lanbide Heziketa Azokan.

ABIAN azokara hurbiltzen direnek eskualdeko prestakuntza-eskaintza zabala eta eskura dauden titulazio ezberdinak bertatik bertara ikusteko eta ezagutzeko aukera izango dute. Egun Debabarrenean 45 bat heziketa ziklo eskaintzen dira, arlo profesional ezberdinetara egokitutako eduki teorikoekin eta praktikoekin, horien artean LH Duala, enplegagarritasun handikoa eta enpresek oso estimatua dutena.

ABIAN azokak iraungo duen hiru egunetan, eskualdeko DBHko eta Batxilergoko ikasleen bisitak izango dira; 700 ikasletik gora igaroko dira bertatik, etorkizun hurbilean zer ikasketa egin erabakitzeko informazio osoa izan dezaten. Ikasleez gainera, publiko orokorrak ere zabalik izango ditu azokako ateak (gurasoak, orientatzaileak, langabezia egoeran dauden pertsonak...).

Ermua eta Mallabiko Oinarrizko Prestakuntzako udal Institutuak dituen hiru espezialitateak aurkezten ditu beste horrenbeste modulu dituen stand ikusgarrian 

Ermua eta Mallabiko Oinarrizko Prestakuntzako udal Institutuak (LHIKa zenak) hiru egunotan aurtengo ikasturtean eskaintzen dituen hiru espezialitateak aurkeztu eta erakutsiko ditu. Hirurak ondoko hauek dira: Ibilgailuen mantenua (elektromekanika espezialiatea) zeinak 27 ikasle biltzen dituen; ile-apaintzea eta estetika, zeinak beste 27 gazte biltzen dituen eta Elementu metalikoen fabrikazioa, zeinak beste 28 pertsona dituen. Heziketa bi ikasturtekoa da eta gainditzen dutenek hezkuntza arautura bueltatzeko eta ikasten jarraitzeko aukera izanen dute edo lan-merkatura jauzia emateko, lanerako oinarrizko ezagutzen jabe baitira.

Institutuaren ikastegia Mallabia udalerrian dago, Osma auzoan, zenbakirik gabeko eraikinean, BI-3302 errepidearen alboan eta herriko eskolen ondoan. Ikastegiak bideoa prestatu eta zabaldu du, non ikasgaien inguruko xehetasunak, instalazioak eta ikasleen egunerokotasuna erakusten duen.