UKEk iragarri du sektoreko mobilizazioek eragina izan dezaketela bere zerbitzuetan

Gaurtik hasi eta datozen bi asteetan zehar kiroldegian, Aritzmendiko instalazioetan eta Betiondon eskaintzen dituen jarduerek eragina, gorabeherak edo etenaldiak izan daitezkeela iragarri du Udal Kirol Erakundeak (UKEk) ohar baten bidez, Bizkaiko kirol zelaien eta lokalen sektorean iragarrita dauden mobilizazioen ondorioz. Abisu horren jatorri edo oinarria, urtarrilaren 21etik 26ra eta otsailaren 4tik 6ra bitarteko egunetarako ELA sindikatuak luzatu duen lanuzte osorako deialdia dago.

Udal erakunde autonomoak iragarpen hau egin du: "ezinezkoa duelako aldez aurrez jakitea zein langilek egin dezakeen bat aipatutako mobilizazioen deialdiarekin, eta absentziek, halakorik izanez gero, eragina izan lezaketelako instalazioen nahiz programatutako jardueren funtzionamenduan lanuzteen ondorioz".

Institutuak ulermena eskatzen digu erabiltzaileoi, eta grebarako eskubidea gauzatzeak sor ditzakeen eragozpenak barkatzeko.