Gurutze Gorria Merkatu Plazan kokatu da, behar handiena dutenentzat elikagaiak kudeatu eta banatzeko

Ermuko Udalak premiazko hitzarmena sinatu du Gurutze Gorriarekin, Elikagai Bankua programak aurrera jarraitu dezan, zerbitzua partzialki hornidura gabe geratzeko arriskuan baitago. Hala, beharrik gehien dituzten pertsona eta familia ahulenentzat oinarrizko elikagai nahikoa eskuratu ahal izango da, eta Covid-19 birusaren hedapenak eragindako krisi soziala arindu.

Hitzarmen horren bidez, Udalak 17.000 euro jarri ditu herriko Elikagai Bankuarentzako produktuak erosteko. Asistentzia-programa hori 2008an jarri zen abian, finantza-krisiaren testuinguruan, eta 12 urte geroago, koronabirusaren Alarma Estatua bete-betean dagoen honetan, Ermuko Udaleko Gizarte Zerbitzuek eskaintzen dituzten zerbitzuen katalogoko jarduera nabarmenetako bat da. Une honetan, haren lana are garrantzitsuagoa da; izan ere, osasun-alertaren ondorioz, Bergarako Elikagaien Bankuak, tokiko programaren hornitzaileak, ateak itxi behar izan ditu, eta, beraz, herriko banaketa guztia ermuar zerbitzuari dagokio orain.

Horretarako, Gurutze Gorria Ermuko Merkatu Plazako beheko solairuan kokatu da, eta bertan bilduko ditu jasotzen duten merkantzia guztia eta supermerkatuek ematen dizkieten produktuak, ondoren herriko familien artean banatzeko. Udalak lau hozkailu kamera jarri ditu hotzean kontserbatzea behar duten elikagaiak gordetzeko, baita hamar metro mahai ere, loteak prestatu ahal izateko.

Gainera, aste honetan ekoizten ari den entrega loteetatik aurrera, hamabost egunean behin, programa indartu eta aberastu egingo da Eibarko eta Ermuko saltoki handiak ematen ari diren produktuei esker. Horiek Elikagai Bankuen sarean ohikoak ez diren produktu galkorren soberakinak dira.

75 familia baino gehiagori laguntza

Osasun-larrialdi egoeran gaudenetik, Elikagaien Bankua programa eskura izateak egoera larrienean dauden 75 familia baino gehiagori erantzun azkarra emateko  aukera eman dio Ermuko Udalari. Izan ere, une latz hauetan, eskaini ahal diegun laguntza osoa behar dute.

Tokiko Elikagai Bankuaren programa hasi zenetik, Ermuko Udalak hainbat funtzio bete ditu. Alde batetik, Gizarte Zerbitzuek pertsona eta familia onuradunen azterketa eta zehaztapena egiten dute, eta bestetik, elikagaiak prozesatzeko eta paketatzeko lokal egokiak jartzen dituzte programaren esku. Gurutze Gorria arduratzen da lan hori egiteaz, baita produktuak Bergaratik, zentrala dagoen lekutik, Ermuara eramateaz ere.

2008an hasi zenetik, programak jarraipena izan du; izan ere, hein handi batean krisi ekonomikoaren ondorio kaltegarrienak gainditu badira ere, pertsona guztiek ezin izan dute gutxiengo ongizate maila berreskuratu. Tamalez, krisia gainditzearen inpresioak gizabidezko elkartasunaren atzerapena eragiten du, eta, horren ondorioz, Elikagaien Bankuen sareak dohaintzaren zati handi bat jasotzeari uzten dio; beraz, loteak gero eta urriagoak dira.

Hileroko loteen edukia maila duin batean mantendu ahal izateko, 2019an, Bergarako Elikagaien Bankutik zetozen produktuen osagarri izango zen diru-laguntza bat onartu zuen Udalak, premia biziko elikagaiak erosteko. Partida osagarri hori Gurutze Gorriari zuzenean emandako diru-laguntza baten bidez kudeatzen da.