2021eko Santixauak, bertan behera

Bigarren urtez jarraian, Udalak jarduera alternatiboen programa bat eskainiko du udako hilabeteetarako

Ermuko Udalak, bigarren urtez, 2021eko Santixauak bertan behera uztea erabaki du. Covid-19aren pandemiak eragindako egungo osasun-krisia dela eta, ezinezkoa litzateke jaiak orain arte ezagutu ditugun bezala antolatzea, eta, beraz, aurten ere ez dira Santixauak ospatuko.

Dena dela, Udal Kultura Saila lanean ari da herritarrentzat jarduera-programa alternatibo bat diseinatzeko, 2020ko uztailean eskaini zen bezala. Ekitaldi horiek ekainean eta uztailean egingo lirateke, Orbe Kardinalaren plazan, eta bertaratzen diren pertsonen osasuna bermatuko da, beharrezko segurtasun- eta higiene-neurri guztiekin.

Laster emango dira ezagutzera jarduera hauen inguruko xehetasun guztiak.