Areitioko igoera moztuta, Lomi Power ingurua urbanizatzeko obrak direla eta

Zearkale eta Lomi Power urbanizazio berria lotuko dituen lurpeko pasabidea eraikitzeko lanak abian dira jada. Datozen sei asteetan, Altuna y Uria enpresak sarbide berria egingo du, bai ibilgailuentzat bai oinezkoentzat, ''baskula'' autobus geralekutik eraikitzen ari diren etxebizitza berrietara. Hori dela eta, irailaren 10era arte, BI-3344 errepidea itxita egongo da Areitiorako igoeran, Kaltxangoko biribilgunetik Zearrekobuelta pareraino doan zatian.

Bi erreiak itxita daudenez, Areitioko gainean eta San Lorentzoko biribilgunean seinaleak jarri dira, ibilgailuentzako desbideratzerik egokienak adieraziz. Hala, Areitiotik udalerrira iritsi ahal izateko, saihesbidetik San Lorentzoko biribilgunera jaistea gomendatzen da, eta handik, herrira sartzea. Beste aukera Mallabia aldera jaitsi eta Ermura Urtia industrialdetik barrena sartzea da.

Bestalde, Zearrekobueltako enpresetara oinez igo ahal izateko, behin-behineko metalezko eskailera bat kokatu da Zearkalen, prentsa kiosko zaharra zegoen lekuan, Torreta Etxetik igotzen den pasealekuaren zati bat ere itxita baitago obrengatik.

Azpimarratu behar da, lan horiek direla eta, ''baskula''ko autobus geltokia kendu egin dela datorren irailaren 10era arte, hemen zehazten den bezala.

Lurpeko pasabideak Lomi Powerreko etxebizitzetako garajeetarako sarbidea emango du, bai eta eremu berean kokatuko den txandakako udal-aparkalekurako sarbidea ere.

Ermuko trafikoaren analisia

Lurpeko pasabideko obrak egiten hasi aurretik, gure herriko trafikoa sakon aztertu da, fluxuak hobeto ezagutzeko eta eragin gutxien izan dezaketen jarduerak aukeratzeko.

Leber ingeniaritza enpresa arduratu da trafikoa aztertzeaz, batez ere Kaltxango eta San Lorentzoko biribilguneetan eta inguruabarretan, eta ikerketaren ondorioen arabera, semaforo eta pasabide alternatiboen bidez errepidea partzialki ixteak auto-pilaketa latzak sortuko lituzke udalerri osoan. Gainera, lanek hilabete batzuk iraungo lukete.

Hori horrela, errepidea osorik ixtea erabaki da, hiritarrentzat eta herriko trafikoarentzat kalte gutxien dakarren aukera baita. Gainera, modu horretara, obren iraupena sei astekoa soilik izango da, eta horietatik lau, abuztuan, hilabete horretan izaten den trafiko eta jarduera murritza aprobetxatuz.

Ikerketa osoa eta obrari buruzko informazio guztia uztailaren 6ko Informazio Batzordeko bideoan ikus daiteke (00:53:15).