Etxebizitza-eraikinetan fatxadak birgaitzeko eta oztopo arkitektonikoak kentzeko diru-laguntzak

Ermuko Udalak bi diru-laguntza deialdi berri ireki ditu hirigintzaren arloan. Batetik, bizitegi-erabilera kolektiboko eraikinen fatxada osoak birgaitzeko eta berritzeko laguntzak eskainiko dira, eta, bestetik, oztopo arkitektonikoak kentzeko eta etxebizitzen irisgarritasuna hobetzeko.

Bi diru-laguntza lerroak independenteak dira, eta bakoitzak bere baldintzak eta aurrekontu-zuzkidurak ditu. Bi kasuetan, eskabideak aurkezteko epea azaroaren 30ean amaituko da, edo jarritako kreditua agortzen denean.

Etxebizitza-eraikinetan fatxadak birgaitzea

Laguntza horien helburua bizitegi-erabilera kolektiboko eraikinen fatxada osoak birgaitzea eta berritzea da. Diru-laguntza horiek jaso ahal izateko, eraikinek Ermuko hiri-lurzoruan egon behar dute eta 25 urtetik gorako antzinatasuna izan behar dute. Gainera, ezingo da laguntzarik eman, xede bererako azken diru-laguntza eman zenetik gutxienez 15 urte igaro ez badira.

Hartzaileak eraikinaren jabe bakarrak izan daitezke, edo jarduteko baimena duten maizterrak, edo eraikinen jabeen komunitateak.

Diru-laguntza horien bidez egin beharreko obrak mota hauetakoak izan daitezke:

• Fatxada guztiak osorik birgaitzea edo berritzea, paramentuak, arotzeria, balkoiak, errementeriak eta abar behar bezala tratatuz.
• Fatxadan bistan dauden kableak eta hodiak ezkutatzea, kanaleta baten bidez sartuta edo ezkutatuta.
• Beheko solairuan dauden elementuen itxituren eta ateen akabera egokia.
• Bide publikorako arropa linea guztiak kentzea, barruko patioak edo terrazak eta balkoiak dituzten eraikinetan.

Diru-laguntza horiek 44.100 euroko aurrekontua dute guztira, eta eskabideak aurkezten diren hurrenkeran emango dira partida agortu arte, betiere ordenantzak eskatzen dituen baldintza guztiak betetzen badira.

Deialdi honetan interesa duten pertsonek edo komunitateek eskaera-inprimakia, informazioa eta dokumentazio osoa udalaren webguneko iragarki-taulan edo Abiapuntu bulegoan eskura dezakete, astelehenetik ostiralera, 08:00etatik 15:00etara.

Oztopo arkitektonikoak kentzea

Diru-laguntzen bigarren lerro honen helburua da atarietan eta bizilagunen komunitateetan komunak diren elementuetan oztopo arkitektonikoak kentzen laguntzea. Atal honetan sartzen dira arrapalak instalatzeko ataria eraberritzea, eskailera-mailak kentzea, jasogailuak instalatzea edo komunitate barruan igogailuak jartzea. Berariaz salbuetsita geratzen dira lehendik dauden igogailuak ordezteko edo berritzeko laguntzak.

Diru-laguntza horien guztizko aurrekontua 21.500 eurokoa da, eta eskaeren hurrenkeraren arabera emango dira partida agortu arte, betiere oinarrietan eskatzen diren baldintza guztiak betetzen badira.

Laguntza horiei buruzko informazio guztia datozen egunetan argitaratuko da Udalaren taula digitalean.