Nina Simoneri omenaldia Eunice bandaren eskutik

Eunice Nina Simone artista eta aktibista ospetsuaren lehen izena da. Grekotik dator, eta "garaipena lortzen duena" esan nahi du. Baina, paradoxikoki, bere izenak daraman positibotasuna eta garaipena ez zituen lagun izan bizitza osoan zehar; izan ere, txikitatik piano klasikoko kontzertista handi bat izateko prestatu arren, ezin izan zuen inoiz bere ametsa bete, Estatu Batuetan nagusi den arrazakeriak zapuztua. Horrela, jazzaren, bluesaren, poparen eta protesta abestiaren artean garatu behar izan zuen bere ibilbidea, artista borrokalariena bihurtuz, gizartearen bidegabekeriak salatuz eta afrikar ondorengoen eskubideen alde borrokatuz.

Larunbat honetan, azaroaren 20a, Eunice bandak soul artista handiari omenaldia egingo dio Lobiano Kultur Gunean. Laukote honek aukeratutako errepertorioak Ninak bere ibilbideko musika ezagutza guztia adierazteko izan zituen alderdi estilistikoak errepasatzen ditu eta bere ibilbideko arrakasta handienetako batzuk biltzen ditu: Sinnerman, Go to hell, Feeling Good, I put a spell on you, I love you, Porgy eta My baby just cares for me soberan ezaguna den arrakasta.

Eunice taldea Mayka Edjole abeslariak eta Gabri Casanova, Lucas de Mulder eta Javier Gomez musikariek osatzen dute.

Kontzertua 20:00etan hasiko da Lobiano Kultur Gunean. Sarrerak 10 euroan daude salgai instalazioetan bertan eta Kutxabankeko leihatila digitalean.