Dena prest Ermuan XXII. Jardunaldi Gastronomikoetarako

Lobiano Gastronomia Elkarteak herriko XXII. Gastronomia Jardunaldiak aurkeztu ditu. Hasi berri dugun ekain honetan zehar, sei jarduera ezberdin izango ditugu Ermuan, eta ohiko Pintxo Lehiaketa izango da protagonista.

Programa datorren asteartean, hilak 7, hasiko da Estrella Dammen garagardo dastaketarekin, 19:00etatik aurrera Plan B kafetegian. Izen-ematea doakoa da establezimenduan bertan, eta 15 lagunentzako tokia dago.

Ekainaren 8an, asteartea, Urkaregi jatetxeak Sergio Humada sukaldari donostiarraren afaria hartuko du. 2020ko Gipuzkoako sukaldari onenaren Gastro Talentua saria jaso zuen Humadak, eta 20 urte besterik ez zituela ireki zuen bere lehen jatetxea. Bera Bera, Alma Hotels eta Via Veneto jatetxeetan sukaldari izan da, eta bere azken proiektuak, Casa Humada, produktua, tradizioa eta bilakaera uztartzen ditu. 35 lagunek bere proposamenez gozatu ahal izango dute 21:00etatik aurrera Urkaregin, aldez aurretik izena eman eta 55 euro ordainduta.

Ekainaren 18an, larunbata, sukaldari zaletuenek pil-pil erako bakailao lehiaketan parte hartzeko aukera izango dute, Bacalaos Alcortak babestuta. Lehiaketa eguerdiko 12:00etan hasiko da Orbe Kardinalaren plazan, eta bikoteka lehiatu ahal izango da, gehienez ere 20 bikote. Izen-emateak 20 euroko prezioa du talde bakoitzeko, eta Mahasti ardotegian bete ahal izango da.

Larunbatean bertan, 11: 00etatik aurrera, KM0 produktuen azoka izango da plazan, eta bertan, besteak beste, Euskalsagardoa, ogia, gozoak, gaztak eta barazkiak ikusteko eta dastatzeko aukera izango dugu.

Jardunaldiei amaiera emateko, ekainaren 23an, osteguna, ardo dastaketa egingo da Mahasti ardotegian, 19:00etan, Tobelos upategiarekin. Jarduera doakoa izango da, baina aldez aurretik izena eman beharko da establezimenduan bertan, 15 plazatara mugatuta baitago.

• Programa

13 proposamen berri Pintxo Lehiaketan

XXII. Gastronomia Jardunaldi hauetako plater nagusia Pintxo Lehiaketa izango da. Tokiko 13 establezimenduk hartuko dute parte ekainaren 13tik 19ra egingo den lehiaketan. Aste horretan, proposamen originalak dastatu ahal izango ditugu lokal hauetan (klikatu argazkietan handiago ikusteko):

Pintxo Lehiaketa

Argazkia	Taberna	Pintxoa	Osagai nagusiak
	Sagarra	Pani-tun	Pani puri, hegalaburra eta ''ajoblanco''
	Plan B	Plan B acalao	Bakailaoa eta Plan B saltsa
	Giroa	Asiertxo	Sekretua, patata eta gorringoa
	Mendiola	Millefeuille	Bakailaoa, patatak eta piperrak
	Jubiletxe	Falsa croqueta de pollo	Lumagorri oilaskoa, kimchi eta barazkiak
	Kiska	Quimera	Bao ogia, masailak eta perretxiko saltsa
	Simon	Bienmesabe	Urdaiazpiko errea, guakamolea eta tximitxurria
	Caperos	Antxopi	Antxoa, tomatea eta gazta
	Txalaparta	Txolumak	Lumagorri izterra, reineta sagarra eta txokolatea
	Amatxi	Baso sorgindua	Oreina, bolovana eta boilur-kabiarra
	Zutabe	Brancada de bacalao con dulce de piquillo	Bakailaoa, patata eta pikilloa
	Urkaregi	Ven3ka	Mendrezka, piperra eta kalabazina
	Lau bide	Azkena	Porruak, espinakak eta onddoak