Marlaska ministroak Izarra Centreko erakusketak bisitatu ditu

Fernando Grande-Marlaska Espainiako Gobernuko Barne ministroa Izarra Centren izan da gaur, asteazkena, Miguel Angel Blanco zinegotziaren bahiketaren eta hilketaren XXV. urteurrena gogoratzeko antolatu diren Aztarna ezabaezina programako erakusketak bisitatzeko.

Marlaskak eta Juan Carlos Abascal alkate ermuarrak agerraldia egin dute Izarra Centreko auditorioan, bertan bildutako agintarien eta prentsaren aurrean. Ministroak eskerrak eman dizkio Ermuko Udalari, terrorismoaren biktimen eta mugimendu sozialen omenezko erakusketak bisitatzera gonbidatzeagatik, eta iragana gogoratzen jarraitzeko beharra azpimarratu du. indarkeria mota guztiak arbuiatuko dituen gizarte bat eraikitzeko.

Ondoren, Agustin Ibarrolaren biktimen omenezko monolitoaren miniatura eman dio alkateak ministroari.

Aurkezpena amaitu ostean, Marlaskak egun Izarra Centren ikus daitezkeen hiru erakusketak bisitatu ditu:

• 4. solairua: Izua azaletan, 60 urteko terrorismoa Espainian prentsaren bidez. Terrorismoaren historia erakusten duten Vocento Taldeko egunkarien azalak.
• 5. solairua: Miguel Angel Blanco gogoan. Elkarbizitza eraikitzen/Memoria para la convivencia. Gogora Memoriaren, Bizikidetzaren eta Giza Eskubideen Euskal Erakundeak antolatutako espazioa, biktimen senideen, gizarte-mugimenduen eta gazteen testigantzak biltzen dituena.
• 11. solairua: Ertzaintzak, Guardia Zibilak eta Polizia Nazionalak elkarrekin antolatutako espazioa, non terrorismoaren aurkako operazioetan atzemandako materialak, armak, jantziak, desaktibazio-ekipoak, balistika-txostenak eta idatzizko edo ikus-entzunezko beste dokumentu batzuk aurkezten diren.

Erakusketa horiek hilaren 25era arte egongo dira zabalik, honako ordutegian: 11:00etatik 14:00etara eta 16:00etatik 20:00etara. Sarrera librea eta doakoa da.