Euskara ikasi nahi? Matrikulak zabalik herriko euskaltegietan

Obrak direla eta, Udal Euskaltegia Santiago elizako lokaletara lekualdatu da ikasturte honetarako

Iritsi da iraila, eta horrekin batera, ikasturte berriaren hasiera. Matrikulazioak abian dira hainbat alor ezberdinetako ikastegietan, eta garai aproposa izan daiteke euskara ikasten hasteko edo jada dakiguna hobetzeko. Horretarako, herrian ditugun bi euskaltegiak, Udal Euskaltegia eta Kaltxango AEK zentroa, lanean ari dira 2022/2023 ikasturtea prestatu eta ikasle berriei harrera egiteko.

Ikasturte honetarako, Udal Euskaltegiak egoitza berria izango du. Teresa Murga eraikineko obrak direla eta, bertan kokatutako hainbat zerbitzu lekuz aldatu dira datozen hilabeteetarako, tartean, liburutegia eta Udal Euskaltegia. Behin-behineko egoitza Santiago elizako lokaletako bigarren solairua izango da, sarrera udaletxe pareko elizako arkupeetatik duena.

Udal Euskaltegian A1etik C1era bitarteko mailak eskainiko dira 16 urtetik gorako pertsonentzat, hainbat ordutegi eta errelebo taldetan, interesa duten pertsona guztiek klaseetara joateko aukera izan dezaten. Informazio gehiago behar izatekotan, edo zalantzak argitu ahal izateko, deitu 943 17 09 25 telefono zenbakira edo idatzi mezua ermukoudaleuskaltegia@gmail.com helbide elektronikora.

Kaltxango AEK zentroak ere euskara ikasteko aukera desberdinak prestatu ditu. Maila guztietako klaseak izango dira bertan, goizez nahiz arratsaldez. Prestakuntza eskaintza zabal horri buruzko informazio gehiago nahi izanez gero, Zearkale 16an duen bulegora jo, 943 17 19 40 telefono zenbakira deitu edo kaltxango@aek.eus helbide elektronikora idatzi dezakezu.

Azpimarratzekoa da euskara ikasteko eta hizkuntzan trebatzeko prozesu horretan, hainbat erakundek diru-laguntzak eskaintzen dituztela. Maila gainditzen duten ikasleek, gainera, matrikularen zenbateko osoa finantzatzeko aukera dute.

• Ermuko Udala. Azken bi urtetan euskaltegi homologatuetan euskara ikastaroren bat egin duten ermuarrentzat edota HABEren erregistroren arabera inoiz euskara ikasten ibili ez den pertsona eta oinarrizko mailan matrikulatzen dena. Epea zabalik irailaren 7tik urriaren 22ra. Informazio guztia hemen.
• HABE. euskaltegi edo euskararen autoikaskuntzarako zentro homologatu bezala sailkatutako batean matrikulatuta egotea, gutxienez 2021eko ekainaren 1ean hasi eta gehienez 2022ko abuztuaren 31ra bitarteko epealdian, eta mailaren bat edo baliokideren bat egiaztatu izana. Baldintza horiek betetzen dituztenek irailaren 8tik urriaren 7ra aurkeztu ahal dituzte eskaerak hemen.
• Lanbide. Euskal Enplegu Zerbitzuan izena emanda dauden langabe eta landunentzat, prestakuntza-ekintzak egiten ari badira edota 2018, 2019, 2020 edo 2021 urteetan egin badituzte. Epea zabalik irailaren 21era arte.