'Laboral Kutxa Team' taldeak Aimar Galdos fitxatu du

Aimar Galdos Alonso txirrindulari ermuarrak ''Laboral Kutxa Team'' taldean korrituko du hurrengo denboraldian, afizionatuen taldean arituko da. Hala iragarri zuen taldeak joan den astean -urtarilak 4an- bere sare sozialetan, publiko egin eta ongietorria egiten zionean: @Gal2aimar ermuarrak bat egiten du taldearekin! Berarekin, 7 txirrindularik egingo dute debuta aurten, gaztetatik igo ondoren. Gero eta gutxiago geratzen da elkartzeko eta lasterketez gozatzeko. Hala zioen hitzez hitz Twitterreko txioak.

Aimar Alonso 18 urteko promesa gaztea da, eta oso pozik dago bi gurpilen espezialitatean kirolari gisa hazten eta garatzen jarraitzeko ematen zaion aukeragatik eta bere talde berriak berarengan jarri duen konfiantzagatik. Galdos gaztea lau aldiz izan da Bizkaiko txapeldun, maila ezberdinetan. Taldekako Espainiako txapelduna izan da Euskadiko selekzioarekin kadete mailan. 2021ean, Mendatako proba irabazi zuen, eta laugarren izan zen gazteen Espainiako Txapelketan. 2022an Mutrikuko eta Karrantzako probetan irabazi zuen. Estatuko gazteen selekzioaren deialdi guztietan parte hartu zuen, Europako txapelketa aurrekoan, eta bere kategoriako Euskadiko selekzioarekin ere korritu zuen.

Azken denboraldian txirrindulari gazteak ''Café Dromedario/Flotamet'' enpresa komertzialak babesten dituen Durangaldeko Txirrindularitza Elkartean korritu du. Aimarrek bere osaba Aitor Galdosen urratsak jarraitu nahi ditu. Aitor Galdos errepideko txirrindulari profesionala izan zen eta ''Team Nippo'', ''Euskaltel-Euskadi'' eta ''Caja Rural'' taldeetan aritu zen.