Alkatea AIC – Automotive Intelligence Center-en eraikin berriaren inaugurazioan izan da

Juan Carlos Abascal Ermuko alkatea Amorebietako AIC automozio zentroaren eraikin berriaren inaugurazioan izan da ostiral honetan. 10.000 metro karratuko eraikinak digitalizazioarekin, konektibitatearekin eta elektrifikazioarekin lotutako jarduerak hartuko ditu, mugikortasunerako irtenbide berrien esparruan.

Boroako 4. Fasea da gune berri hau. Prozesua 2009ko urtarrilean hasi zen, lehen fasearekin, eta 2010ean eta 2015ean handituz joan da, I+G+Bko eta prestakuntzako unitate berriak hartu ahal izateko.

Ermuko Udala AIC Automotive Intelligence Center Fundazioaren parte da sortu zenetik, Bizkaiko Foru Aldundiarekin, Amorebietako Udalarekin, ACICAE Automozio Kluster Elkartearekin eta Ermua eta ingurunea ordezkatzen duten hainbat enpresarekin batera.

AIC Automozio Zentroak diziplina anitzeko lana eta sektore horretan kualifikazio handiko pertsonen koordinazioa bilatzen ditu. Mundu-mailako konpetentzia espezializatuko zentroa da, eta bere helburuak sektore-ezagutza erraztea, automobilgintzarekin lotutako ikerketa aplikatua areagotzea, maila profesional guztietan automobilgintzako prestakuntza bultzatzea eta sektorean balio erantsi handiko enpresa-proiektu berrien sorkuntza endogenoa bultzatzea dira.

Laugarren fase honen inaugurazio-ekitaldian Iñigo Urkullu lehendakaria izan da buru, eta bertan izan dira Unai Rementeria Bizkaiko Ahaldun Nagusia eta AICko presidentea, Idoia Mendia bigarren lehendakariordea eta Arantxa Tapia Ekonomiaren Garapeneko sailburua, besteak beste.

Iñigo Urkulluk esan du automobilgintzaren eta trenbideen sektoreak "funtsezkoak" direla Euskadirentzat, eta enpresei dei egin die kalitatezko enplegu-aukerak sortzen, berritzen eta inbertitzen jarraitzeko, Euskadik bere posizio pribilegiatua mantentzen jarrai dezan.

Duela 14 urte AIC automozio zentroaren proiektuaren lehen fasea martxan jarri zutenen ikuspegia eta lana aitortu ditu lehendakariak: "Hainbeste sinesten dugun binomioari eutsiz egin dugu lan: lankidetza publiko-pribatuan".

Inaugurazio hitzaldiaren ondoren, bertaratuek eraikin berrian dauden bi enpresen instalazioak bisitatu dituzte: Gestamp, automozioko osagaietarako fabrikazio-eredu malgu bat garatzen ari den ingeniaritza aurreratuko laborategia ezagutu dute, eta CAF, non tren baten mugimendu automatikoaren simulazio bat erakutsi den.