Ermua hobetuz haurren ikuspegitik

Ermuko Haurren Kontseiluak euren taldetik haratago zabaldu nahi du udal gaietan txikienek duten parte-hartzea, eta datozen asteetan, herriko Lehen Hezkuntzako ikasle guztiek beren proposamenak aurkeztu ahal izango dizkiote Udalari, ikastetxeetan egingo den parte-hartze prozesu baten bidez.

Ermuko Alkatetzako organo aholkulari gazteenak 2022/2023 ikasturtean udalerriko haurrentzat lehentasunezkotzat jotzen zituzten sei politikak definitu zituen: jolasa, harremanak, animaliak, osasuna, autonomia (gauzak bakarrik egin ahal izatea) eta esperientziazko ikaskuntza.

Politika bakoitzarekin kutxa-hautestontzi bat osatu da. Kutxan, aztertu beharreko gaiaren deskribapen laburra, Kontseiluak identifikatutako aktiboak edo indarguneak eta aktibo horien hobekuntzak bultzatzeko proposamen sorta bat daude. Sei kutxa-hautestontzi horiek Ermuko Lehen Hezkuntzako bost ikastetxeetan txandakatuko dira, astebetez ikastetxe bakoitzeko ikasleek beren ideiekin txartel batzuk bete eta kutxetan utzi ahal izateko.

Parte-hartze prozesuaren egutegia honakoa da:

• Urtarrilaren 15etik 19ra: Ongarai Eskola
• Urtarrilaren 22tik 26ra: Anaitasuna Ikastola
• Urtarrilaren 29tik otsailaren 2ra: San Pelaio Ikastetxea
• Otsailaren 5etik 9ra: San Lorentzo Ikastetxea
• Otsailaren 19tik 23ra: Eskolabarri

Asmoa da haurren parte-hartzea Lehen Hezkuntzako ikasle guztietara zabaltzea eta haien ideiak jasotzea Haurren Kontseiluak planteatutako gai orokorretan oinarrituta.

Bestalde, azpimarratu behar da alkateak aurten Haurren Kontseilu berriari helarazi dion lehen lan-ildoa edo erronka esperientziazko ikaskuntzako politika garatzea ahalbidetuko duten proposamenak egitea dela, iaz proposatutako zutabeetako bat, alegia.